بۇگىن پرەزيدەنت جارلىعىمەن شىعىس قازاقستان وبلىسىنا نۇرىمبەت امان ۇلى ساقتاعانوۆ اكىم بولىپ تاعايىندالدى, دەپ جازادى Egemen.kz.
جاڭا اكىمدى وبلىس اكتيۆىنە ۇكىمەت باسشىسى ولجاس بەكتەنوۆ تانىستىردى.
ولجاس بەكتەنوۆ بۇعان دەيىن ايماق باسشىسى لاۋازىمىن اتقارعان ەرمەك كوشەرباەۆقا ناتيجەلى جۇمىسى مەن ءوڭىردىڭ دامۋىنا قوسقان ۇلەسى ءۇشىن العىس ءبىلدىردى.
پرەمەر-مينيستر مەملەكەت باسشىسىنىڭ شىعىس قازاقستان وبلىسى باسشىلىعىنىڭ الدىنا قويعان مىندەتتەرىنە توقتالدى. جيىندا حالىقتى جۇمىسپەن قامتاماسىز ەتىپ, ءوڭىر ەكونوميكاسىنىڭ دامۋىنا سەرپىن بەرەتىن پەرسپەكتيۆالى باعىتتار دا ايقىندالدى. باسىم جوبالار قاتارىندا شاعىن جانە ورتا بيزنەستى قولداۋ, اۋىل شارۋاشىلىعى ونىمدەرىن قايتا وڭدەۋ, تسيفرلىق شەشىمدەردى ەنگىزۋ جوسپارلارى بار. حالىقتى ساپالى اۋىز سۋمەن قامتاماسىز ەتۋ, ينجەنەرلىك ينفراقۇرىلىمدى جاڭعىرتۋ جۇمىستارىن كۇشەيتۋدىڭ ماڭىزدىلىعى دا اتاپ ءوتىلدى.
«تابيعي دەمالىس ايماقتارى مەن تاريحي-مادەني ورىنداردى دامىتۋ ارقىلى تۋريستىك الەۋەتتى اشۋعا ەرەكشە نازار اۋدارىلۋى ءتيىس. بۇقتىرما سۋ قويماسى ارقىلى ەلىمىزدەگى ەڭ ءىرى كوپىردىڭ اشىلۋى, قاتونقاراعاي جانە زايسان كۋرورتتىق ايماقتارىندا اۋەجايلاردىڭ سالىنۋى سالا مەن جالپى ەكونوميكانىڭ دامۋىنا قوسىمشا سەرپىن بەرەدى. باسىم مىندەتتەر قاتارىندا ارنايى ەكونوميكالىق جانە يندۋستريالىق ايماقتاردى ينجەنەرلىك ينفراقۇرىلىممەن قامتاماسىز ەتە وتىرىپ, ينۆەستورلار ءۇشىن قولايلى جاعداي جاساۋ, ونەركاسىپتە زاماناۋي تەحنولوگيالار مەن يننوۆاتسيالىق تاسىلدەر قولدانۋ جانە باسقا دا ماسەلەلەر بەلگىلەنگەن», دەدى ولجاس بەكتەنوۆ.