جامبىل وبلىسىنداعى بەساعاش اۋىلىندا دەنە شىنىقتىرۋ-ساۋىقتىرۋ كەشەنى ەل يگىلىگىنە بەرىلدى. جاڭا نىساننىڭ اشىلۋ سالتاناتىنا وبلىستىق ءماسليحاتتىڭ توراعاسى ابدالى نۇراليەۆ, سپورت ارداگەرلەرى مەن اۋىل تۇرعىندارى قاتىستى, دەپ جازادى Egemen.kz.
وبلىس اكىمدىگىنىڭ ءباسپاسوز قىزمەتى كەلتىرگەن دەرەككە جۇگىنسەك, جاڭا سپورت كەشەنىنىڭ قۇرىلىسى «اۋىل – ەل بەسىگى» باعدارلاماسى اياسىندا جۇرگىزىلگەن. جوبانىڭ قۇنى – 446 ملن 774 مىڭ تەڭگەنى قۇرايدى. ەكى قاباتتى عيماراتتا اۋىل بالالارىنىڭ كۇرەس, بوكس, فۋتبول, باسكەتبول, ۆولەيبول سەكىلدى سپورت تۇرلەرىمەن شۇعىلدانۋىنا بارلىق مۇمكىندىك قاراستىرىلعان.
جالپى العاندا جامبىل اۋدانىندا سوڭعى جىلدارى سپورتتى دامىتۋعا ايرىقشا نازار اۋدارىلىپ وتىر. جەرگىلىكتى اتقارۋشى بيلىك وكىلدەرىنىڭ ايتۋىنشا, الداعى ۋاقىتتا تاستوبە اۋىلىندا دا ءدال وسىنداي سپورت كەشەنى بوي كوتەرەدى.
رەسمي دەرەككە سۇيەنسەك, وتكەن جىلى جامبىل وبلىسىندا 115 سپورت نىسانى پايدالانۋعا بەرىلگەن. ونىڭ ىشىندە 9 دەنە شىنىقتىرۋ –ساۋىقتىرۋ كەشەنى, 3 سپورت كەشەنى, جانە 103 سپورت الاڭشاسى بار. اتالعان سپورتتىق نىسانداردىڭ كەيبىرى دەمەۋشىلەر ەسەبىنەن سالىنعان. اتقارىلعان جۇمىستىڭ ناتيجەسىندە ءوڭىر حالقىنىڭ سپورتتىق ينفراقۇرىلىممەن قامتىلۋى 68,3 پايىزعا جەتكەن. قازىرگى كەزدە وبلىس حالقىنىڭ 41,2 پايىزى بۇقارالىق سپورتقا تارتىلعان.