مەديتسينالىق ينفراقۇرىلىمدى جاڭعىرتۋ جانە ونكولوگيالىق قىزمەتتى دامىتۋ شەڭبەرىندە اباي وبلىسى دەنساۋلىق ساقتاۋ باسقارماسىنىڭ «يادرولىق مەديتسينا جانە ونكولوگيا ورتالىعىندا» «قازاقستان حالقىنا» قوعامدىق قورىنىڭ قولداۋىمەن SOMATOM go.Sim كومپيۋتەرلىك توموگرافى جانە TrueBeam ساۋلەلىك تەراپيا جۇيەسى پايدالانۋعا بەرىلدى, دەپ جازادى Egemen.kz.
وبىرمەن كۇرەستە وڭتايلى قىزمەت اتقاراتىن ساۋلەلىك تەراپيا اپپاراتتارى الداعى ۋاقىتتا دەنساۋلىق سالاسىن دامىتۋعا جول اشىپ, ءوڭىر حالقىنا ونكولوگيالىق ساپالى قىزمەت كورسەتۋگە ماڭىزدى قادام باسىپ وتىر.
ء«بىز ءاربىر ازاماتتىڭ ساپالى جانە قازىرگى زامانعى مەديتسينالىق, سونىڭ ىشىندە ونكولوگيالىق كومەككە قول جەتكىزۋىنە جاعداي جاساۋعا ۇمتىلامىز. بۇل اپپاراتار كوپتەگەن ادامداردىڭ ءومىرىن ساقتاپ قالۋعا جانە قالالار مەن اۋىلداردا ونكولوگيالىق اۋرۋلاردى دياگنوستيكالاۋ مەن ەمدەۋدىڭ تيىمدىلىگىن ارتتىرۋعا كومەكتەسەدى دەگەن سەنىمدەمىن. بۇل سونىمەن قاتار قاتەرلى ىسىك اۋرۋىنان تولىق ساۋىعۋ مۇمكىندىگىن ارتتىرا وتىرىپ, ونى ەرتە كەزەڭدەردە انىقتاۋعا كومەكتەسەدى. وسىنداي اپپاراتتار «قازاقستان حالقىنا» قوعامدىق قورىنىڭ دەمەۋشىلىگىمەن ەلىمىزدىڭ 5 وڭىرىنە جەتكىزىلەدى», دەيدى اتالعان قوردىڭ باسقارما توراعاسى ءلاززات شىڭعىسباەۆا.
مەديتسينانىڭ دامۋىنىڭ ارقاسىندا ساۋ تىندەرگە بارىنشا از اسەر ەتە وتىرىپ, ونكولوگيالىق اۋرۋلاردى نەعۇرلىم دالىرەك دياگنوستيكالاۋ جانە ءتيىمدى ەمدەۋ مۇمكىن بولعانى ءمالىم. مىسالى, SOMATOM go.Sim كومپيۋتەرلىك توموگرافى ساۋلەلىك تەراپيانى دالمە-ءدال جوسپارلاۋ ءۇشىن ىسىكتەردى ەگجەي-تەگجەيلى كوزبەن شولۋعا مۇمكىندىك بەرەدى. ارنايى تۇسىرىلگەن كەسكىننىڭ جوعارى ساپاسىن ساقتاي وتىرىپ, ساۋلەلەنۋ دوزاسىن مەيلىنشە ازايتادى جانە ەم-دوم شاراسىن اعزانىڭ تابيعي فيزيولوگيالىق پروتسەستەرىن ەسكەرە وتىرىپ جۇرگىزۋ مۇمكىن بولادى.
«True Beam» ساۋلەلىك تەراپيا جۇيەسى تەك قاتەرلى جاسۋشالارعا اسەر ەتە وتىرىپ ساۋلەلەنۋدىڭ يننوۆاتسيالىق ادىستەرىن قولدانۋعا جانە سەرپىندى قاداعالاۋ تەحنولوگياسىنىڭ ارقاسىندا ەڭ كۇردەلى جانە قوزعالمالى ىسىكتەردى ەمدەۋگە مۇمكىندىك بەرەدى.
«ىسكە قوسىلىپ وتىرعان جابدىقتار قازىرگى زامانعا ساي جانە جوعارى دالدىكتەگى تەحنيكا عانا ەمەس, بۇل باعا جەتپەس ادام ءومىرىن, ازاماتتارىمىزدىڭ دەنساۋلىعىن ساقتاۋعا جاسالعان سالاۋاتتى ءىس. ولاردىڭ ءدال دياگنوز قويۋعا, ەمدەۋدى جوسپارلاۋعا, ساۋلەلىك تەراپيانىڭ سالدارىن ازايتۋعا مۇمكىندىك بەرەتىنى دالەلدەنگەن. ورتالىقتىڭ جوعارى بىلىكتى پەرسونالىنىڭ ارقاسىندا بۇل جابدىق يگى ىسكە قىزمەت ەتەتىن بولادى. وسى اپپاراتتاردى پايدالانۋ ارقىلى ورتاق كۇش-جىگەرىمىزدى جۇمساي وتىرا ازاماتتارىمىزدىڭ يگىلىگى ءۇشىن قىزمەت ەتەمىز, دەيدى «يادرولىق مەديتسينا جانە ونكولوگيا ورتالىعىنىڭ» باس دارىگەرى سايات تاڭاتاروۆ.
اتالعان قايىرىمدىلىق جوبا اياسىندا الداعى ۋاقىتتا وزگە دە وڭىرلەردى جوعارى تەحنولوگيالىق قوندىرعىلارمەن, قازىرگى زامانعى ونكولوگيالىق جابدىقتارمەن قامتاماسىز ەتۋ كوزدەلىپ وتىر. كەلەشەكتە استانا, الماتى, قاراعاندى, پەتروپاۆل قالالارىنداعى مەديتسينا ورتالىقتارىندا ىسكە قوسىلاتىن بۇل ساۋلەلىك تەراپيا اپپاراتتارى دەنساۋلىق سالاسىن جاقسارتۋعا مول مۇمكىندىك بەرەتىنى انىق.