تۇزەۋ مەكەمەسىندە وتىرعاندار كىتاپ وقىعانى ءۇشىن جازاسىن قىسقارتا الادى

Podrobno.uz سايتىنىڭ جازۋىنشا, وزبەكستاننىڭ ولي ءماجىلىس زاڭ شىعارۋ پالاتاسى «ميللي تيكلانيش» پارتياسىنىڭ سوتتالعانداردىڭ جازا مەرزىمىن كىتاپ وقۋ ارقىلى قىسقارتۋ تۋرالى باستاماسىن قولدادى.

زاڭ جوباسىنا سايكەس, بەكىتىلگەن ءتىزىم بويىنشا وقىلعان ءار كىتاپ جانە تابىستى تاپسىرىلعان ەمتيحان سوتتالعان ادامنىڭ جازا مەرزىمىن ءۇش كۇنگە قىسقارتادى.

بۇل باستاما تەك جازانى قىسقارتۋ ءۇشىن عانا ەمەس, شارتتى تۇردە مەرزىمىنەن بۇرىن بوساتۋ جانە جازا جەڭىلدىكتەرىن قاراۋ كەزىندە دە ەسكەرىلەدى. وسىعان بايلانىستى قىلمىستىق-پروتسەسسۋالدىق كودەكسىنە (536-1-باپ) جانە قىلمىستىق-اتقارۋ كودەكسىنە (80-1-باپ) ءتيىستى وزگەرىستەرى ەنگىزىلمەك.

وزبەكستان بيلىگى حالىقارالىق ستاندارتتارعا سايكەس سوتتالعانداردىڭ قۇقىقتارىن قورعاۋ جانە ولاردى قايتا الەۋمەتتەندىرۋ باعىتىندا بىرقاتار رەفورما جۇرگىزىپ جاتىر.

«بۇل باستاما سوتتالعانداردى ءوزىن-ءوزى دامىتۋعا ىنتالاندىرىپ قانا قويماي, ولاردىڭ تۇزەلۋگە دەگەن قۇلشىنىسىن ارتتىرادى. الەمدىك تاجىريبە كورسەتكەندەي, مۇنداي رەفورمالار وڭ ناتيجە بەرەدى», – دەپ اتاپ ءوتتى زاڭ شىعارۋشى ورگان وكىلدەرى.