قازىر استانادا بوچچاشىلاردىڭ وقۋ-جاتتىعۋ جيىندارى ءوتىپ جاتىر. سونىڭ اياسىنداعى سەمينار-ترەنينگتەردە وتاندىق پاراسپورتشىلار مەن جاتتىقتىرۋشىلارعا كورەيا جانە تايلاند ەلدەرىنەن كەلگەن بەلگىلى حالىقارالىق ماماندار جاتتىعۋ وتكىزىپ, ءوز تاجىريبەلەرىمەن بولىسۋدە. كەشە پارااتلەتتەردىڭ جاتتىعۋىنا پارلامەنت سەناتىنىڭ توراعاسى – قازاقستان بوچچا فەدەراتسياسىنىڭ پرەزيدەنتى ماۋلەن اشىمباەۆ ارنايى باردى.
بوچچادان پراكتيكالىق سەمينار-ترەنينگكە استانا, الماتى, شىمكەنت, تالدىقورعان, اتىراۋ, جاڭاوزەن, پاۆلودار قالالارى جانە جەتىسۋ, اباي وبلىستارى سياقتى ءار وڭىردەن كەلگەن 16 سپورتشى مەن جاتتىقتىرۋشى, سونداي-اق 9 وڭىرلىك فەدەراتسيانىڭ باسشىلارى قاتىسىپ جاتىر.
ءىس-شارانىڭ ماقساتى – وڭىرلەردە اتالعان سپورت ءتۇرىن دامىتۋدىڭ بىرىڭعاي ستراتەگياسىن ازىرلەۋ جانە سپورتشىلاردىڭ الەۋەتىن ودان ءارى اشۋعا ىقپال ەتۋ. سونىمەن قاتار پراكتيكالىق شەبەرلىكتىڭ دە ماڭىزى زور. ترەنينگكە شاقىرىلعان جاتتىقتىرۋشىلار – الەمگە تانىمال جانە بوچچادان پاراليمپيادا چەمپيوندارىن دايىنداپ جۇرگەن تاجىريبەلى ماماندار. ناقتى ايتقاندا, وڭتۇستىككورەيالىق ساراپشى چول حەن كۆوننىڭ ادىستەمەسى بويىنشا بۇكىل الەم بوچچاشىلارى جاتتىعادى. ال تايلاندتان كەلگەن كوتسيلا سامريت – بوچچادان وسى ەلدىڭ ۇلتتىق قۇراماسىنىڭ باس باپكەرى.
م.اشىمباەۆ بوچچاشىلارمەن بەلسەندى جۇمىس ىستەپ جاتقان شەتەلدىك جاتتىقتىرۋشىلارعا العىس ءبىلدىرىپ, سپورتشىلارعا ساتتىلىك تىلەدى. سونداي-اق ول بۇگىندە ەلىمىزدە بوچچامەن اينالىسقىسى كەلەتىندەر قاتارى جىل سايىن كوبەيىپ كەلە جاتقانىن جانە وتاندىق سپورتشىلاردىڭ دايىندىق ساپاسى دا ارتا تۇسكەنىن اتاپ ءوتتى. سوندىقتان الەمدىك دەڭگەيدەگى جاتتىقتىرۋشىلاردىڭ شەبەرلىك ساباقتارى جاڭا تەحنيكانى مەڭگەرۋگە, بىرەگەي ادىستەمەلەردى پىسىقتاۋعا جانە بوچچانىڭ ەرەكشەلىكتەرىنە تەرەڭ ۇڭىلۋگە جول اشادى.