مەديتسينا بۇيىمدارىن شىعاراتىن زاۋىت

جامبىل ءوڭىرىنىڭ ونەر­كاسىپ سالاسى تۋرالى ءسوز بولسا, ويىمىزعا بىردەن «قازفوسفات» جشس مەن «Super Pharm» فارماتسەۆتيكالىق زاۋىتى كە­لە­تىنى راس. سول «Super Pharm» جشس-نا قاراستى زاۋىت­تىڭ قا­­سىنان بوي كوتەرگەن «ەرساد-2021» كاسىپورنى دا بىرنە­شە جىل بويى مەديتسينا سالا­سىنا قاجەتتى بۇيىمداردى ۇزدىك­سىز شىعارىپ جاتىر. پاندەميا كەزىندە قۇرىلىسى باس­تالعان ءوندىرىس وشاعىنىڭ باس­شىلارى 2022 جىلى جۇمىس­تى ناقتى ءبىر جولعا قويىپ, جىلما-جىل ءونىم كولەمىن ارتتىرۋعا باسىمدىق بەردى.

«2022 جىلى جۇمىسىن باس­تاعان بۇل كاسىپورىن مۇناي ونىمدەرى قالدىقتارىنان مەديتسينا, قۇرىلىس, اۋىل شا­رۋاشىلىعى جانە اۆتوجول سالاسىنا قولدانىلاتىن ەكولوگيالىق تازا توقىما ەمەس ماتا ماتەريالىن وندىرەتىن بىردەن-ءبىر زاۋىت سانالادى. كاسىپورىن باسشىلارى جىل وتكەن سايىن ءونىم كولەمىن ارتتىرىپ جاتىر.

زاۋىت ۇجىمى بىلتىر 308,2 توننا ياعني, 278,3 ملن تەڭگەنىڭ ءونىمىن ءوندىردى. ءوندىرىس وشاعى اشىلعالى بەرى مەملەكەتتىك بيۋد­جەتكە 99 ميلليون تەڭگەدەن استام سالىق تولەدى. بۇل كاسىپ­ورىن باسشىلىعى مەن جۇمىس­شىلاردىڭ ەسەلى ەڭبەگىنىڭ ارقا­سىندا مۇمكىن بولىپ وتىر», دەيدى جامبىل اۋدانى كاسىپكەرلىك جانە ونەركاسىپ ءبولىمىنىڭ باسشىسى قۋات وشاقباي.

بىرنەشە جىل بۇرىن جاڭا زاۋىتتىڭ اشىلۋ سالتاناتىندا ءسوز العان «Super Pharm» جشس قۇرىلتايشىسى قايرات قاي­مولداەۆ كاسىپورىن جۇمى­سىن جۇيەلەۋگە سول كەزدەگى پان­دەميانىڭ ايتارلىقتاي اسەر ەتكەنىن ايتقان ەدى. قىسىلتاياڭ شاقتا جاڭا ءىستى قولعا العان سەرىك­تەستىك باسشىسى ءبىرىنشى كەزەكتە شيكىزاتقا دەگەن تاۋەلدىلىكتى جويۋدى ماقسات تۇتقان.

«ەندى ءبىز وندىرىسكە قاجەتتى شيكىزات ءۇشىن كورشىلەس مەملەكەتتەرگە تاۋەلدى بولمايمىز. ۋاقىتىندا ايتارلىقتاي قيىن­دىقتارمەن بەتپە-بەت كەلگەنىمىز راس. ونىڭ نەسىن جاسىرامىز؟ شيكىزات جەتەدى دەگەنشە ۋاقىت­تان ۇتىلدىق. جولىمىزدى بوگە­گەن ماسەلەلەر بولدى. سول ۋاقىتتا قاجەتتى قۇرىل­عىلاردى ساتىپ الىپ, ەدەل-جەدەل ىسكە كىرىستىك. ماسەلەن, جول قۇرىلىسىندا بەتوننىڭ استىنا سالىناتىن ماتانى ءوندىرۋدى ويلاستىردىق. سونداي-اق جيھاز­دى قاپتايتىن ماتالاردى ءوندىرۋ جاعىن دا قاراستىردىق. ال مە­دي­تسيناعا قاجەتتى بۇيىمدار ىلگە­رىدەن بەرى وندىرىلەدى عوي», دەيدى ق. قايمولداەۆ.

قۋات وشاقباي كەلتىرگەن مالىمەتكە سۇيەنسەك, «ەرساد -2021» كاسىپورنى مەديتسينا سالاسىندا ءبىر رەت قولدانىلاتىن (سپانبود) توقىما ەمەس ماتا وندىرەدى. ءونىم جۇقا پوليمەرلى جىپتەن جاسالاتىن كورىنەدى. سونىسىمەن ساپالى دەسەدى.

«جوعارىدا ايتىلعان ماتە­ريال­دان مەديتسينا سالاسىنا قاجەتتى ارنايى بىررەتتىك كيىم تىگىلەدى. بۇدان بولەك, اياقكيىم, مەديتسينا قىزمەتكەرلەرىنە ارنالعان قالپاقتار مەن حالاتتار, بەتپەردە, توسەمە وندىرىلەتىنىن ايتا كەتكەن ءجون شىعار.

جالپى العاندا, زاۋىت قىز­مەت­كەرلەرى شىعاراتىن ونىم­دەردى سالا ماماندارى ساپا تۇر­عىسىنان جوعارى باعالاعان. ءتۇرلى تاسىلدەر ارقىلى جاسالاتىن بۇيىمداردىڭ زالالسىزداندىرۋ قابىلەتى جوعارى دەسەدى. سۋدى دەر كەزىندە قايتارا­دى ەكەن. سونىمەن قاتار اۋانىڭ وتۋىنە مۇمكىندىك تۋدىرادى», دەيدى جامبىل اۋداندىق كاسىپكەرلىك جانە ونەركاسىپ ءبولىمىنىڭ باسشىسى ق.وشاقباي.

رەسمي دەرەككە جۇگىنسەك, «ەرساد-2021» زاۋىتىندا قازىرگى كەزدە 25 ادام تۇراقتى جۇمىسپەن قامتىلعان. ولاردىڭ ورتاشا جالاقىسى – 300 مىڭ تەڭگە. سونداي-اق كاسىپورىن باسشىلارى جۇمىسشىلاردى ىستىق تاماقپەن قامتۋ, ولاردى ارنايى قوعامدىق كولىكپەن تاسۋ جۇمىسىن جولعا قويعان. ءبىر سوزبەن ايتقاندا, زاۋىت قىز­مەتكەرلەرىنىڭ الاڭسىز ەڭبەك ەتۋىنە بارلىق جاعداي قاراس­تىرىلعان.

جوعارىدا ايتقانىمىزداي, كاسىپورىن وندىرەتىن ءونىم كولەمى جىل وتكەن سايىن ارتىپ كەلەدى. زاۋىت باسشىلىعى ءبىرىنشى كەزەكتە ىشكى نارىقتى قامتاماسىز ەتۋگە باسىمدىق بەرىپ وتىر. ولار كەلتىرگەن دەرەككە سەنسەك, وندىرىلگەن ءونىمدى نەگىزىنەن شىمكەنت, الماتى, تاراز سەكىلدى وزگە دە بىرنەشە قالاداعى مەكەمەلەر تۇتىنادى.

جامبىل وبلىسى,

جامبىل اۋدانى,

ايشا ءبيبى اۋىلى