اتىراۋ وبلىسىندا جىل باسىنان بەرى تۇرمىستىق زورلىق-زومبىلىققا قاتىستى 30 قىلمىستىق ءىس تىركەلىپ وتىر. ونىڭ ىشىندە 12 قىلمىستىق ءىس سوتقا جولداندى.
وبلىستىق پوليتسيا دەپارتامەنتى انىقتاۋ باسقارماسىنىڭ انىقتاۋشىسى, پوليتسيا پودپولكوۆنيگى دارحان بۇلجانوۆتىڭ ايتۋىنشا, ايەلدەر مەن بالالاردىڭ قۇقىقتارى مەن قاۋىپسىزدىگىن قامتاماسىز ەتۋگە باسىمدىق بەرىلگەن.
«مەملەكەت باسشىسى بىلتىرعى 15 ساۋىردە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنا قول قويدى. وسىعان بايلانىستى دەنساۋلىققا قاساقانا جەڭىل زيان كەلتىرۋ, ۇرىپ-سوعۋ سياقتى قۇقىق بۇزۋشىلىقتار ءۇشىن قىلمىستىق جاۋاپكەرشىلىك كوزدەلەدى. ماسەلەن, اتىراۋ وبلىسىنىڭ اۋماعىندا جىل باسىنان بەرى وتباسىنداعى تۇرمىستىق زورلىق-زومبىلىق دەرەگىمەن 30 قىلمىستىق ءىس تىركەلدى. ونىڭ ىشىندە قر قىلمىستىق كودەكسىنىڭ 108-1-بابىمەن 6, ال 109-1-بابىمەن 24 دەرەك بار. تەرگەپ-تەكسەرۋدىڭ ناتيجەسىمەن 12 قىلمىستىق ءىس سوتقا جولداندى. قىلمىستىق-پروتسەستىك كودەكسىنىڭ 128-بابى بويىنشا 5 كۇدىكتى ۇستالىپ, قاماۋعا الىندى» دەپ حابارلادى دارحان بۇلجانوۆ.