اقتوبە. 6 قاڭتار. قالا تۇرعىندارىنىڭ ءوتىنىشى بويىنشا ءنومىرى 2, 8, 23 جانە 39-شى اۆتوبۋستاردىڭ باعىتتارىنا وزگەرىستەر ەنگىزىلدى. بۇل تۋرالى egemen.kz ءتىلشىسى حابارلادى.
«بيىل 19 قاڭتاردا «اقتوبە قالالىق تۇرعىن ءۇي-كوممۋنالدىق شارۋاشىلىق, جولاۋشىلار كولىگى جانە اۆتوموبيل جولدارى ءبولىمى» مەملەكەتتىك مەكەمەسى «اقتوبە قالاسىنداعى جولاۋشىلار مەن جۇكتەردى اۆتوموبيلمەن تاسىمالداۋ قۇقىعىن يەلەنۋ» بويىنشا قايتا بايقاۋ وتكىزدى. بۇل جولى كونكۋرس 50 باعىت بويىنشا 6 لوت نەگىزىندە وتكىزىلدى. بايقاۋعا قالاداعى ەكى تاسىمالداۋشى مەكەمە — «اۆتوپارك» جانە «پاتپ», ياعني بۇرىنعى «تروللەيبۋس پاركى» جاۋاپكەرشىلىگى شەكتەۋلى سەرىكتەستىكتەرى قاتىستى. بايقاۋ قورىتىندىسى بويىنشا ءبىز «اۆتوپارك» سەرىكتەستىگىمەن 4 لوت, ال «پاتپ» مەكەمەسىمەن 2 لوت نەگىزىندە كەلىسىمشارت جاساستىق. ءبىر ايتا كەتەرلىك جايت, قالاداعى 4 باعىت, ياعني ءنومىرى 12, 13, 17 جانە 20-شى اۆتوبۋستاردىڭ جۇمىسىن ەندى «اۆتوپارك» مەكەمەسى قاداعالايتىن بولادى», — دەپ مالىمدەدى بۇقارالىق اقپارات قۇرالدارى وكىلدەرىمەن وتكەن ءباسپاسوز ءماسليحاتىندا «اقتوبە قالالىق تۇرعىن ءۇي-كوممۋنالدىق شارۋاشىلىق, جولاۋشىلار كولىگى جانە اۆتوموبيل جولدارى ءبولىمى» مەملەكەتتىك مەكەمەسىنىڭ باسشىسى ناعىمجان الدياروۆ.
ونىڭ ايتۋىنشا, ءنومىرى 2-ءشى باعىتتاعى اۆتوبۋستار ءجۇرۋ قوزعالىسىن «نۇر اقتوبە» شاعىن اۋدانىنان باستايدى. بۇعان دەيىن بۇل اۋداننىڭ تۇرعىندارى پريگورودنىي اۋىلىنان كەلەتىن ءنومىرى 29-شى باعىتتاعى قوعامدىق كولىككە وتىرۋ ءۇشىن تاسجولدىڭ بويىنا شىعاتىن. ەندى ءنومىرى 2-ءشى اۆتوبۋستار جاڭا اۋدانداعى كوپقاباتتى ۇيلەردىڭ جانىنا ايالدايتىن بولادى. الداعى ۋاقىتتا «نۇر اقتوبە» اۋدانىنا كىرەبەرىستەگى جولدى جوندەۋ جۇمىستارىن قولعا الۋ كوزدەلۋدە.
ءنومىرى 2-ءشى باعىتتاعى كولىكتەر «نۇر اقتوبە» اۋدانى ماڭىنداعى اينالما جول ارقىلى ساتپاەۆ كوشەسىنە ءتۇسىپ, جوعارى تاسجولمەن نەكراسوۆ كوشەسى ارقىلى جاڭا كوپىردەن وتەدى. بۇل باعىتتاعى اۆتوبۋستار 11-شاعىن اۋدان ارقىلى مانشۇك مامەتوۆا كوشەسىمەن «ساپار» اۆتوۆوكزالىنا ايالدايدى, وسى باعىتپەن كەرى قايتادى.
ال ءنومىرى 8-ءشى باعىتتاعى قوعامدىق كولىكتەر بۇعان دەيىن ارىنوۆ, پۋگاچەۆ كوشەلەرى ارقىلى جۇرەتىن بولسا, ەندى بۇل باعىتتاعى اۆتوبۋستار مالىشكا اۋدانى ارقىلى ەمبى كوشەسىنىڭ بويىمەن تەمىرجول وتكەلىن بەتكە الادى. سوسىن اۋەجاي جانە اۋە قالاشىقتارىنا ايالداپ, وسى باعىت بويىنشا كەرى قايتادى. بۇل باعىتقا قاتىناعان شاعىن اۆتوبۋستاردى 42 ورىندىق ورتاشا سىيىمدىلىقتاعى كولىكتەر الماستىرىپتى. بۇعان دەيىن قالاداعى ءنومىرى 23-ءشى باعىتتا 4 اۆتوبۋس جولاۋشىلار تاسىمالداسا, ەنگىزىلگەن وزگەرىستەردەن كەيىن بۇل باعىتقا تاعى ەكى اۆتوبۋس قوسىلدى. ناعىمجان الدياروۆتىڭ ايتۋىنشا, قالاداعى ءنومىرى 39 باعىتتاعى اۆتوبۋستار بۇرىن ۋاقىتشا باۋ-باقشالارعا عانا قاتىناسا, ەنگىزىلگەن وزگەرىستەرگە بايلانىستى ەندى بۇلار كۇن سايىن جولاۋشىلار تاسىمالدايتىن بولادى. بۇل باعىتتاعى اۆتوبۋستار كۇنىنە 6 رەت اقتوبە قالاسى ماڭىنداعى سادوۆوە (پريگورودنىي-2) ەلدى مەكەنىنە قاتىنايدى.
ساتىبالدى ءساۋىرباي.
دەرەك: egemen.kz.
سۋرەت: rikatv.kz.