قازاقتىڭ اياۋلى دا كورنەكتى اقىن قىزى, مەملەكەتتىك سىيلىقتىڭ لاۋرەاتى, قوعام قايراتكەرى فاريزا وڭعارسىنوۆانىڭ ەسىمى پوەزياسىمەن دە, ەلىنىڭ كەمەل كەلەشەگى ءۇشىن سىڭىرگەن ەرەن ەڭبەگىمەن دە ەل جادىندا جاڭعىرا بەرەدى. ويتكەنى, اقىننىڭ نازىك تە كاۋسار جىرلارىن بارشا وقىرمان ءسۇيىپ وقيدى. اقىننىڭ شىعارماشىلىعىن زەرتتەۋگە تالپىنىس بىلدىرۋشىلەر اراسىندا اتىراۋداعى نازارباەۆ زياتكەرلىك مەكتەبىنىڭ وقۋشىلارى دا بار.
اتالعان ءبىلىم ورداسى حيميا-بيولوگيا باعىتىندا شاكىرت تاربيەلەۋگە ماشىقتانعانمەن, مۇندا جاس بۋىننىڭ ءبىلىمدى, بىلىكتى بولۋىمەن بىرگە, ەلدىڭ تاريحى مەن مادەنيەتىن, ادەبيەتىن مەن ونەرىن تەرەڭ مەڭگەرۋىنە باسىمدىق بەرىلەدى. مەكتەپ ديرەكتورى ايداربەك ايتبۋكەشوۆتىڭ ايتۋىنشا, اسىرەسە, ادەبيەتكە جانى قۇمار وقۋشىلاردىڭ تالابىنا زور قولداۋ جاسالىپ وتىر. ءتىپتى, مەكتەپ وقۋشىلارىنىڭ فاريزا اقىنعا ارناعان شىعارمالارىنىڭ جيناعى شىعارىلىپ, اقىن مۇراسىن كەڭىنەن ناسيحاتتاۋ دا قولعا الىنىپتى. سول سەبەپتەن, ءبىلىم ورداسىندا قازاقتىڭ كورنەكتى اقىنى فاريزا وڭعارسىنوۆا اتىنداعى ارناۋلى سىنىپ اشۋ ۇيعارىلىپتى.
اقىن اتىنداعى ارناۋلى سىنىپتىڭ اشىلۋىندا فاريزا وڭعارسىنوۆانىڭ كۋرستاسى, فيلولوگيا عىلىمدارىنىڭ دوكتورى, پروفەسسور قادىر ءجۇسىپ ستۋدەنتتىك كۇندەردىڭ, اياۋلى اقىننىڭ پوەزيا الەمىنە العاش قادام باسقان ساتتەرىنىڭ ەستەلىگىمەن ءبولىستى. ال پەداگوگيكا عىلىمدارىنىڭ كانديداتى بيبىگۇل قايىرجانقىزى اقىن پوەزياسىنىڭ تەرەڭ سىرلارى تۋرالى اڭگىمەلەدى. فاريزا اقىن شىعارماشىلىعىن زەرتتەۋگە تالپىنىس بىلدىرگەن مەكتەپ وقۋشىلارى ءوز ولەڭدەرىن وقىدى.
ارناۋلى سىنىپتىڭ اشىلۋىنا اقىننىڭ ءسىڭلىسى اريتا اسقارقىزى دا قاتىستى.
جولداسبەك شوپەعۇل,
«ەگەمەن قازاقستان».
اتىراۋ وبلىسى.
سۋرەتتى تۇسىرگەن
راحىم قويلىباەۆ.