پەتروپاۆل. 2 مامىر. وبلىستىق تارتىپتىك كەڭەس مۇشەلەرى كۇن تارتىبىنە ۇسىنىلعان ماسەلەلەردى تالقىلاي كەلىپ, ەكى شەنەۋنىكتى قىزمەتتەن بوساتۋ جونىندە شەشىم الدى. بۇل تۋرالى سولتۇستىك قازاقستان وبلىستىق مەملەكەتتىك قىزمەت ىستەرى جانە سىبايلاس جەمقورلىققا قارسى دەپارتامەنتتىڭ ءباسپاسوز قىزمەتى حابارلادى.
«جاس ناتۋراليستەر ستانساسى» كوممۋنالدىق كاسىپورنىنا قاتىستى قارالعان ماسەلە بويىنشا كوپتەگەن زاڭسىزدىقتاردىڭ بەتى اشىلدى. اتاپ ايتقاندا, مەكەمە باسشىسى عالىم تەمىربەكوۆ جاقىن تۋىسىنىڭ جۇمىستا بولماعانىنا قاراماستان ەڭبەك تابەلىن تولتىرتىپ, جالاقى تولەتتىرگەن. جەكە كاسىپكەرلەردىڭ يەلىگىنە گاراج جالعا بەرىلگەن. قارجى سالاسىندا دا ولقىلىقتار ورىن العان. سىبايلاس جەمقورلىققا جول بەرگەنى ءۇشىن ونى لاۋازىمنان شەتتەتۋ تۋرالى ۇسىنىس ءبىراۋىزدان قولداۋ تاپتى.
سول سياقتى وبلىستىق جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى ورىندالماعان تاپسىرمالارعا جالعان اكت تولتىرىپ, مەردىگەرلىك ۇيىمعا كوپە كورىنەۋ ارتىقشىلىقتار جاساعانى ءۇشىن قىزمەتىنەن الاستاتىلاتىن بولدى.
تارتىپتىك كەڭەس وتىرىسىندا تايىنشا اۋداندىق وقۋ ءبولىمى جەتەكشىسىنىڭ بۇرىن سىبايلاس قىلمىسقا ۇرىنعان تۇلعانى مەكتەپ ديرەكتورلىعىنا تاعايىنداعان ارەكەتىنە لايىقتى باعا بەرىلىپ, قىزمەتىنەن تومەندەتۋگە ۇسىنىس جاسالدى.
ءومىر ەسقالي.
دەرەك: مەملەكەتتىك قىزمەت ىستەرى جانە سىبايلاس جەمقورلىققا قارسى دەپارتامەنتتىڭ ءباسپاسوز قىزمەتى.
سۋرەت: egemen.kz