شىعىس ءوڭىرىنىڭ ورتالىعى – وسكەمەندە وڭ وزگەرىستەر كوپ. اسىرەسە, قالانى قاق جارىپ اعىپ جاتقان ەركە ەرتىستىڭ سول جاعالاۋى تەز وركەندەپ كەلەدى. جاڭادان بوي كوتەرىپ كەلە جاتقان بۇل بولىكتە تۇرعىن ۇيلەر, اكىمشىلىك عيماراتتار, سپورتتىق-ساۋىقتىرۋ كلاستەرى, تەاتر جانە ساياباقتار بەلدەۋىنىڭ قۇرىلىسى جۇرگىزىلىپ, بىرىنەن سوڭ ءبىرى پايدالانۋعا بەرىلۋدە. ك.ماركس داڭعىلىنىڭ قۇرىلىسى جۇزەگە اسىرىلا باستادى. تۇرعىن ءۇي-كوممۋنالدىق شارۋاشىلىق سالاسىندا اۋقىمدى جۇمىستار اتقارىلۋدا. اۋماقتاردى كورىكتەندىرۋ مەن سانيتارلىق تازالاۋعا كوپ كوڭىل بولىنۋدە. وسكەمەندى وركەندەتۋ جونىندە قولعا الىنعان يگى جۇمىستار جونىندە شاھار باسشىسى تەمىربەك قاسىمجانوۆ قالا تۇرعىندارىمەن ەسەپتىك كەزدەسۋىندە باياندادى.
قالا اكىمى سول جاعالاۋدا ورنالاسقان جىبەك ماتالار كومبيناتى, كۇلەنوۆ جانە جىلاندى شاعىن اۋداندارىنىڭ تۇرعىندارىمەن كەزدەسۋ بارىسىندا جىبەك جولى, باستاۋ, بازوۆايا, 5-جەلتوقسان, ريجسكايا, زايسان, ەنتۋزياست كوشەلەرى اسفالتتالىپ, فرۋنزە, ششورس, ۋليانوۆ كوشەلەرىنە اعىمداعى جوندەۋ جۇمىستارى جۇرگىزىلگەنىن جەتكىزدى. اكىمنىڭ ايتۋىنشا, سونداي-اق 11 كوشەنىڭ بويىمەن ورتالىقتاندىرىلعان سۋ قۇبىرى تارتىلىپ, ك.ماركس داڭعىلىنا جارىق شامدارى, ءا.مولداعۇلوۆا كوشەسىنە ايالداما كەشەنى ورناتىلدى. ەكى كوندومينيۋم اۋماعىندا 33 شاعىن ساۋلەتتىك مۇسىندەر پايدا بولدى. 18 قوقىس الاڭى جويىلدى. بارلىق كوندومينۋمدەردە ارداگەرلەر كەڭەسى, جەرگىلىكتى ءوزىن-ءوزى باسقارۋ كوميتەتتەرى, قۇقىق بۇزۋشىلىقتىڭ الدىن الۋ كەڭەستەرى قۇرىلدى.
تۇرعىندار كەزدەسۋدە كوكەيكەستى ماسەلەلەرىن جەتكىزدى. ونىڭ ىشىندە ك.ماركس داڭعىلىنداعى اۆتوبۋس باعىتتارىن ۇزارتۋ, جابايى جانۋارلاردى اۋلاۋ, بولاتوۆ اتىنداعى ەمحانانىڭ قىزمەت كورسەتۋ ساپاسىن جاقسارتۋ جانە باسقا دا ماسەلەلەر بار. كەزدەسۋگە قاتىسقان سالالىق قۇرىلىم باسشىلارى اتالعان ماسەلەلەردىڭ شەشىمىن تابۋعا ۋادە بەردى. جاڭا اۋداننىڭ تۇرعىندارى قالانىڭ تەز ءوسىپ كەلە جاتقانى ءۇشىن شاھار باسشىسىنىڭ جۇمىسىن وڭ باعالاپ, قىزمەتىنە تابىس تىلەدى.
تەمىربەك قاسىمجانوۆ سونىمەن بىرگە, وكتيابر جانە ابلاكەتكا شاعىن اۋداندارىنىڭ تۇرعىندارىمەن كەزدەستى. تۇرعىن ءۇي-كوممۋنالدىق شارۋاشىلىعىن جاڭعىرتۋ باعدارلاماسى بويىنشا جەمىستى جۇمىستار جۇرگىزىلگەن شاعىن اۋدانداردا بيىل «جاسىل بەلدەۋ» جوباسى قولعا الىنىپ, گاگارين بۋلۆارىندا دەمالىس ءمۇيىسى, بالالاردىڭ ويىن الاڭى سالىنباق. سونداي-اق, قالا مەنشىگىنە وتكەن مەتاللۋرگتەر ساياباعى جاڭا كەستەگە ساي قىسى-جازى قىزمەت كورسەتەتىن بولادى.
دۋمان اناش,
«ەگەمەن قازاقستان».
وسكەمەن.