مەن – ۇلى وتان سوعىسىنىڭ قىرعىنىن كورگەن اداممىن. ودان كەيىنگى بەيبىت ءومىردىڭ نانىن ماڭداي تەرىممەن تاپتىم,
ستاتيستيكا سالاسىندا قىزمەت ىستەدىم, قازاقستاننىڭ دامۋىنا مىسقالداي بولسا دا ءوز ۇلەسىمدى قوستىم, وتباسىن تەربەتىپ, بالا تاربيەلەپ, سولاردان شوپشەگىمدى ءسۇيىپ وتىرعان باقىتتى جانمىن.
ءوز ءومىرىمدى تىزبەلەپ وتىرعانىم, مەنىڭ سوعىستان امان قايتقاننان كەيىنگى قازاقستانداعى باقىتتى ءومىرىم تەك بەيبىتشىلىكتىڭ ارقاسى ەكەنىن ايتۋ ەدى. ءوزىم قازاقستاننىڭ تۋماسىمىن, وسى قوستاناي قالاسىنىڭ ىرگەسىندەگى اۋىلدا تۋىپ-ءوستىم. بەيبىتشىلىكتىڭ ءوزى ەلدىڭ ىشىندەگى ۇلتتار مەن ۇلىستاردىڭ, سىرتتاعى مەملەكەت اراسىنداعى تاتۋ ءومىر ءسۇرۋ عوي. تۇتاس ەل تۇگىل, ءبىر وتباسىندا ءبىر كۇن ۇرىس بولسا, سول ۇيدەن بەرەكە كەتەدى. كەڭقولتىق قازاق جەرىندەي قاسيەتتى مەكەن بار ما ەكەن؟ بۇل جەردىڭ قاسيەتىنىڭ ءوزى حالقىنىڭ قانىندا بار قوناقجايلىلىعى مەن قانعا سىڭگەن ادامگەرشىلىگىندە جاتىر. مۇنى تاريح تا جاقسى بىلەدى, بۇگىن دە وسى كەڭ دالانى جايلاعان, ونىڭ سۋىن ءىشىپ, وتىن وتتاعان ءار ۇلىس سەزىنەدى.
ەلباسى نۇرسۇلتان نازارباەۆ قازاقستان ءوز الدىنا ەل بولعان سوڭ الدىمەن ساياساتتى قويا تۇرىپ, ەكونوميكانى دامىتۋ مەن حالىق بىرلىگىن تۋ ەتىپ ۇستادى. قازاعى, ورىسى, ۋكراينى, تاتارى, ازەربايجانى, وزبەگى, ەۆرەيى, باسقاسى بار جۇمعان جۇدىرىقتاي بىرلىكتە ءومىر ءسۇرىپ كەلەمىز.
مەن ون ءتورت جىلدان بەرى ارداگەرلەر كەڭەسىن باسقارىپ كەلەمىن. دەنساۋلىعىمىزدىڭ جەتكەنىنشە قوعامدىق جۇمىسقا بەلسەنە ارالاسامىز. سوندا قايسىمىزدىڭ اۋزىمىزعا الدىمەن تۇسەتىنى – ۇلتتار ءبىرلىگى, بەيبىت ءومىر. ويتكەنى, بالالارىمىز, نەمەرەلەرىمىز ءبىز كورگەن توزاقتى كورمەۋى ءتيىس. ۋكراينا تۋرالى بەرىلىپ جاتاتىن حابارلاردى قازىر تىڭداي المايمىن. ونداعى توگىلگەن قان تۋرالى ەستۋگە مەنىڭ دەنساۋلىعىم جەتپەيتىن بولىپ ءجۇر. ءححى عاسىردا بارلىق عىلىمدى, ونەردى دامىتقان ادامزاتتىڭ اقىلى قان توكپەۋگە جەتپەي جاتسا نە ايتاسىڭ؟
مەكتەپكە, وقۋ ورىندارىنا جاستارمەن كەزدەسۋگە ءجيى شاقىرادى. سوندا ءسوزدى الدىمەن بەيبىتشىلىك, ۇلتتار دوستىعى تۋرالى باستايمىن. ءبىزدىڭ ەلىمىزدەگى ۇلتتار اراسىنداعى بىرلىك, سىيلاستىق سول قان توگىپ جاتقان ەلدىڭ بارلىعىنا ۇلگى بولعانداي. كوشەدە كەتىپ بارا جاتسام, قوستانايداعى قاي ۇلتتىڭ وكىلى بولسا دا مەنىڭ الدىمنان كەسىپ وتپەيدى. قاي ۇلتتىڭ وكىلى بولسىن تانىعانى كەلىپ قولىمدى الىپ سالەم بەرەدى. تەك مەن ەمەس, ارداگەرلەردىڭ بارلىعى دا وسىنداي سىي-قۇرمەتتى سەزىنەدى. ال بۇل – كەيىنگى ۇرپاققا دا مول تاربيە. ۇلتتار بىرلىگى جوق ەلدە مۇنداي سىيلاستىق بولمايدى.
قازاقستاننىڭ بولاشاعى وتە جارقىن. ويتكەنى, بىرلىك بار جەردە بەرەكە بار. مەنىڭ باقىتىم دا وسى.
ميحايل پودولياكوۆ,
قوستاناي قالالىق ارداگەرلەر كەڭەسىنىڭ توراعاسى, ۇلى وتان سوعىسىنىڭ ارداگەرى.
قوستاناي.