سۋ قويماسىنىڭ قۇرىلىسى بايزاق پەن تالاستىڭ سۋ تاپشىلىعى ماسەلەسىن شەشۋى ءتيىس, دەپ حابارلايدى Egemen.kz قر سۋ رەسۋرستارى جانە يرريگاتسيا مينيسترلىگىنىڭ ءباسپاسوز قىزمەتىنە سىلتەمە جاساپ.
اتالعان جوبا العاش رەت 2020 جىلى تالقىلانعان. سول كەزدە وبلىس اكىمدىگىنىڭ ءباسپاسوز قىزمەتى تالاس پەن بايزاق اۋداندارىنىڭ شەكاراسىندا سىيىمدىلىعى 11 ميلليون تەكشە مەتر سۋ قويماسىن سالۋ جوسپارلانعانىن حابارلاعان ەدى.
سۋ رەسۋرستارى جانە يرريگاتسيا مينيسترلىگى يسلام دامۋ بانكىمەن ىنتىماقتاستىق اياسىندا جامبىل وبلىسىندا جاڭا سۋ قويماسىن سالۋدى جوسپارلاپ وتىر. سونداي-اق, 76 كانال مەن جۇمىس ىستەپ تۇرعان 1 سۋ قويماسى جوندەلەدى.
«بايزاق اۋدانىندا - 18 كانال, تالاس اۋدانىندا – 1 كانال, سارىسۋ اۋدانىندا – 11 كانال, مەركى اۋدانىندا – 1 كانال, شۋ اۋدانىندا – 45 كانال قالپىنا كەلتىرىلەدى. ال, قورداي اۋدانىنداعى قاراقوڭىز سۋ قويماسىنا رەكونسترۋكتسيا جاسالادى. بايزاق اۋدانىندا جاڭادان «اقمولا» سۋ قويماسى سالىنادى», دەلىنگەن حابارلامادا.
مينيسترلىكتىڭ مالىمەتىنشە, سۋ قويمالارىن رەكونسترۋكتسيالاۋ جانە سالۋ 9300 گەكتار جەرگە سۋ بەرۋ ساپاسىن جاقسارتادى. ال, 76 كانالدى جوندەۋ وبلىستاعى 24,7 مىڭ گەكتار ەگىس القابىن سۋمەن جابدىقتاۋدى جاقسارتادى.
«سونىمەن قاتار, بيىل وڭىردە ۇزىندىعى 67 شاقىرىم بولاتىن 7 كانالدىڭ ۋچاسكەلەرىن جوندەۋ جوسپارلانىپ وتىر. بىلتىر 69 شاقىرىم كانال جوندەۋدەن ءوتتى. بۇل 13 مىڭ گەكتار ەگىس القابىن سۋارمالى سۋمەن قامتۋ ساپاسىن جاقسارتادى», دەيدى سۋ شارۋاشىلىعى نىساندارىن دامىتۋ دەپارتامەنتىنىڭ باسشىسى قۇدايبەرگەن قورعانباەۆ.