ورال قالالىق سوتىندا ورال قالالىق ساۋلەت ءبولىمىنىڭ ەكس-باسشىسى 33 جاستاعى مۇراتبەك تاشەنباەۆقا قاتىستى سوت پروتسەسى اياقتالدى, دەپ حابارلايدى Egemen.kz.
شەنەۋنىككە پارا الدى جانە قىزمەت بابىن اسىرا پايدالاندى دەگەن ايىپ تاعىلدى. ونىمەن بىرگە 27 جاستاعى نۇرسۇلتان عاتاۋ دا كۇدىكتىلەر قاتارىندا. ول - ءبولىمنىڭ باس مامانى. قىلمىستىق ءىس بويىنشا ءۇشىنشى ايىپتالۋشى 41 جاستاعى اسىلجان كوپباەۆ پارا بەردى دەپ ايىپتالدى.
ولاردىڭ قىلمىستىق ارەكەتتەرى سالدارىنان مەملەكەتكە 92 ميلليون تەڭگەگە جۋىق سوماعا اسا ءىرى كولەمدە زيان كەلتىرىلگەن.
سوت ۇكىمىمەن مۇراتبەك تاشەنباەۆ وزىنە تاعىلعان ايىپتار بويىنشا كىنالى دەپ تانىلدى. ول 7 جىلعا باس بوستاندىعىنان ايىرىلدى. سونىمەن قاتار, سوت وعان ءومىر بويىنا قانداي دا ءبىر مەملەكەتتىك قىزمەتتە جۇمىس ىستەۋگە تىيىم سالدى. تاشەنباەۆ سوت زالىندا قاماۋعا الىندى. ول بۇرىن ۇيقاماقتا بولعان. ەندى بۇرىنعى باس ساۋلەتشى جازاسىن قاۋىپسىزدىگى ورتاشا تۇزەۋ مەكەمەسىندە وتەيتىن بولادى.
نۇرسۇلتان عاتاۋ پارا العانى جانە لاۋازىمدىق وكىلەتتىكتەرىن اسىرا پايدالانعانى ءۇشىن دە كىنالى دەپ تانىلدى. وعان 3 جىل 6 اي باس بوستاندىعىنان ايىرۋ جازاسى تاعايىندالدى. ەلدەن شىقپاۋ تۋرالى قولحاتى قاماۋدا ۇستاۋعا اۋىستىرىلدى. عاتاۋ سوت زالىندا قاماۋعا الىندى.
سوت اسىلجان كوپباەۆتى پارا بەرگەنى ءۇشىن كىنالى دەپ تانىپ, ونى جەتى جىلعا باس بوستاندىعىنان ايىردى. ول بۇرىن كەپىل سوماسىن تولەپ, بوستاندىقتا جۇرگەن. الايدا, كوپباەۆ تا سوت ۇكىمى بويىنشا سوت زالىندا قاماۋعا الدى.