اتالعان كولەمدەگى سۋ قازاقستانعا 1 قازانعا دەيىن كەلمەك. بۇل 2024 جىلمەن سالىستىرعاندا 1 ملرد تەكشە مەترگە ارتىق, دەپ حابارلايدى Egemen.kz.
سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ پەن وزبەكستان سۋ شارۋاشىلىعى ءمينيسترى شاۆكات حامراەۆ ەكىجاقتى سۋ ىنتىماقتاستىعىن تەرەڭدەتۋ جونىندەگى بىرلەسكەن جۇمىس توبىنىڭ 12-ءشى وتىرىسىندا وسى جونىندە كەلىسىمگە كەلگەن.
ۆەدومستۆونىڭ ءباسپاسوز قىزمەتى ءمالىم ەتكەندەي, تاراپتار وتكەن سۋ شارۋاشىلىعى ماۋسىمىندا (2023 جىلعى قازان – 2024 جىلعى قازان) قازاقستانعا 15 ملرد تەكشە مەتر سۋ جىبەرىلگەنىن اتاپ ءوتتى. وسىلايشا, بيىل بۇل كولەم 1 ملرد تەكشە مەترگە ۇلعايادى دەپ كۇتىلىپ وتىر. سونداي-اق, وزبەك تاراپى بيىل سۋارۋ ماۋسىمىندا «دوستىق» كانالى ارقىلى تۇراقتى سۋ بەرۋدى قامتاماسىز ەتۋگە كومەكتەسەدى.
بۇدان بولەك, مينيسترلەر مەملەكەتارالىق كانالداردا بىرلەسكەن جوندەۋ جۇمىستارىن جۇرگىزۋ تۋرالى ۋاعدالاستى. بۇل قازاقستاننىڭ تۇركىستان وبلىسى مەن وزبەكستاننىڭ جيزاق وبلىسىنىڭ شارۋالارىنا سۋ بەرۋ ساپاسىن جاقسارتادى.
«كەزدەسۋدە تالقىلانعان تاعى ءبىر تاقىرىپ سىرداريا وزەنىندە سۋدى ەسەپكە الۋدى اۆتوماتتاندىرۋ ماسەلەسى بولدى. وسىعان دەيىن ءبىز ەسەپ جۇيەسى ورناتىلاتىن العاشقى 10 نۇكتەنى انىقتادىق. ءار ەلدىڭ اۋماعىندا 5 نۇكتەدەن. بۇگىن ءبىز جوبانىڭ تەحنيكالىق-ەكونوميكالىق نەگىزدەمەسىن ازىرلەۋ ءۇشىن تەحنيكالىق تاپسىرمانى كەلىستىك. اقپان ايىندا ورتاق ءىس-قيمىلدى تالقىلاۋ ءۇشىن حالىقارالىق ۇيىمداردىڭ وكىلدەرىمەن بىرلەسكەن جۇمىس توبىنىڭ كەزدەسۋى وتەدى», دەدى مينيستر نۇرجان نۇرجىگىتوۆ.