پەداگوگيكالىق ۋنيۆەرسيتەتتەر بىرلەسىپ كاسىبي دامۋ ورتالىعىن اشتى

گونكونگ ءبىلىم بەرۋ ۋنيۆەرسيتەتىنىڭ پرەزيدەنتى, پروفەسسور لي چي كين دجون اكادەميانىڭ بولاشاق ىنتىماقتاستىق ءۇشىن پلاتفورما بولاتىنىنا سەنىم ءبىلدىردى.

«قازاق ۇلتتىق قىزدار پەداگوگيكالىق ۋنيۆەرسيتەتىمەن ىنتىماقتاستىق ورناتقانىمىزعا ورتاق ماقساتقا كۇش بىرىكتىرۋ. ونداعى باعىتىمىز – مۇعالىمدەردىڭ كاسىبي دەڭگەيىن ارتتىرۋ, قازاقستانداعى ءبىلىم بەرۋ ساپاسىن جاقسارتۋ, سونداي-اق گونكونگ اار (قىتاي) مەن قازاقستان اراسىنداعى ىسكەرلىك بايلانىستى دامىتۋ. گونكونگ ۋنيۆەرسيتەتىنىڭ كوپ جىلدىق تاريحى بار جانە ءبىلىم بەرۋ سالاسىندا رەيتينگى جوعارى. كوشباسشىلىق, STEM ءبىلىم بەرۋ جانە باعالاۋ سالالارىندا تاجىريبەمىز مول جانە وسى باعىتتاردا بىلىمىمىزبەن بولىسۋگە, وقىتۋ مۇمكىندىكتەرىن ۇسىنۋعا, سونداي-اق ۋنيۆەرسيتەتتەرمەن بىرلەسكەن زەرتتەۋلەر جۇرگىزۋگە دايىنبىز. اكادەميانىڭ بولاشاق ىنتىماقتاستىق ءۇشىن پلاتفورما بولاتىنىنا سەنىمدىمىز», دەپ اتاپ ءوتتى ول.

QyzPU رەكتورى گۇلميرا قانايدىڭ ايتۋىنشا, EdUHK – قازاقستان ءبىلىم اكادەمياسى اياسىندا مۇعالىمدەردىڭ كاسىبي بىلىكتىلىگىن ارتتىرۋ ماقساتىندا ءۇش باعىت بويىنشا وقۋ باعدارلامالارىن ازىرلەۋ جوسپارلانۋدا. اكادەميا اياسىندا مۇعالىمدەردىڭ بىلىكتىلىگىن ارتتىرۋعا باعىتتالعان بەس وقۋ باعدارلاماسىن ازىرلەۋ جوسپارلانىپ وتىر. ءۇش ۋنيۆەرسيتەت ازىرلەيتىن بۇل باعدارلامالار حالىقارالىق دەڭگەيدە سەرتيفيكاتتالىپ, مەكتەپ مۇعالىمدەرىنىڭ كاسىبي بىلىكتىلىگىن ارتتىرۋعا كومەكتەسەدى.

«Abai University جاساندى ينتەللەكت جانە ينكليۋزيۆتى ءبىلىم بەرۋ بويىنشا نەگىزگى باعدارلامالاردى ازىرلەيدى. QyzPU كوشباسشىلىق, STEAM-ءبىلىم بەرۋ جانە باعالاۋ ماسەلەلەرىنە جاۋاپتى بولادى. قازىرگى ۋاقىتتا ەلىمىزدە 800-دەن استام «جايلى مەكتەپتەر» سالىنۋدا. وسى مەكتەپتەرگە ماماندار دايارلاۋ مەن كوشباسشىلىق بويىنشا كۋرستار وتكىزۋ وتە ماڭىزدى. كوشباسشىلىق باعىتى بويىنشا قازىرگى جانە بولاشاق مەكتەپ باسشىلارىنىڭ داعدىلارى مەن ءبىلىمىن دامىتۋعا كوڭىل بولىنەدى. سونىمەن قاتار STEM-ءبىلىم بەرۋدى دامىتۋ, اسىرەسە قىز بالالاردى وسى باعىتتار بويىنشا وقىتۋ – الەمدىك تۇراقتى دامۋ مەن گەندەرلىك تەڭدىك ماقساتتارىنىڭ ءبىرى. وسىعان بايلانىستى ءبىز مۇعالىمدەرگە ارنالعان STEM باعىتىنداعى بىلىكتىلىكتى ارتتىرۋ كۋرستارىن ۇيىمداستىرۋدى جانە ۋنيۆەرسيتەتىمىزدىڭ ستۋدەنتتەرى مەن مەكتەپ مۇعالىمدەرىنە ارنالعان وقۋ باعدارلامالارىن جەتىلدىرۋدى جوسپارلاپ وتىرمىز. ءۇشىنشى باعىت – ءبىلىمدى باعالاۋ جۇيەسىن جەتىلدىرۋ, باعالاۋ تۇرلەرىن سىنىپتىق, ۇلتتىق جانە حالىقارالىق دەڭگەيدە دامىتۋ. ءۇش ۋنيۆەرسيتەت اراسىنداعى بۇل اۋقىمدى باستاما بولاشاقتا وڭ وزگەرىستەرگە الىپ كەلەتىنىنە سەنىمدىمىز. ءبىز بۇل باعدارلامالاردى مەكتەپ مۇعالىمدەرىنە وسى جىلدىڭ كۇزىنە قاراي ۇسىنۋدى جوسپارلاپ وتىرمىز», دەدى رەكتور ءوز سوزىندە.

QyzPU عىلىمي جۇمىس جانە حالىقارالىق ىنتىماقتاستىق جونىندەگى پرورەكتورى زاكير جۇماقۇلوۆ اتاپ وتكەندەي, پەداگوگيكالىق ۋنيۆەرسيتەتتەردىڭ ميسسياسى – مەكتەپتەگى ءبىلىمدى جاقسارتۋ. مەكتەپ جۇيەسىن الدىڭعى قاتارلى بىلىممەن قامتاماسىز ەتۋ ءۇشىن بىرلەسىپ عىلىمي زەرتتەۋلەر جۇرگىزۋ جانە ۇنەمى جاڭا ءبىلىمنىڭ شىڭىندا بولۋ كەرەك. وسى سەبەپتى عالىمدار تاڭدالعان باعىتتار بويىنشا بىرلەسكەن زەرتتەۋلەر جۇرگىزەتىن بولادى. جۇرگىزىلگەن جۇمىستىڭ ناتيجەسى ەلىمىزدىڭ وڭىرلىك جوعارى وقۋ ورىندارىنىڭ اليانسىن دا قامتيتىن بولادى. وعان پەداگوگيكا بويىنشا ءبىلىم بەرەتىن 6 جوعارى وقۋ ورنى كىرەدى.

اكادەميالىق الماسۋ مەن يننوۆاتسيالاردى ەنگىزۋگە باعىتتالعان بۇل باعدارلاما زامان تالابىنا ساي ماماندار دايارلاۋعا ۇلەس قوساتىن بولادى.