ادىلەتتى قوعام قۇرۋداعى باستى ماسەلە – زاڭ مەن ءتارتىپ. مەملەكەت باسشىسىنىڭ وسى باعىتتاعى تاپسىرماسىن جۇزەگە اسىرۋعا بايلانىستى ەلىمىزدىڭ قۇقىق جانە زاڭ شىعارۋ جۇيەسىندە ىسكە اسىپ جاتقان جۇمىستار قوعامدا كەڭىنەن ءتۇسىندىرۋدى قاجەت ەتەدى, دەپ جازادى Egemen.kz.
وسى ماقساتتا زاڭ عىلىمدارىنىڭ دوكتورى, پروفەسسور, ۇعا اكادەميگى مارات قوعاموۆ نارحوز ۋنيۆەرسيتەتى قۇقىق جانە مەملەكەتتىك باسقارۋ مەكتەبىندە كەزدەسۋ وتكىزىپ, جاستار اراسىندا اقپاراتتىق جۇمىس بارىسىندا ەلدەگى زاڭ مەن ءتارتىپتىڭ ماڭىزىن اتاپ ءوتتى.
ءدارىس بارىسىندا اكادەميك م.قوعاموۆ قىلمىستىق ءىس جۇرگىزۋ بارىسىندا كەزدەسەتىن قيىندىقتار, قۇقىقتىق جۇيەدەگى رەفورمالاردىڭ ورىندالۋى مەن باقىلاۋ, ۇيلەستىرۋ جۇيەسى تۋرالى باياندادى. قۇقىق سالاسىنىڭ مايتالمانى رەتىندە قازاقستانداعى زاڭ سالاسىنداعى وزگەرىستەردى قاراپايىم, تۇسىنىكتى تىلدە سيپاتتاپ, تۇسىندىرگەن ساراپشى ستۋدەنتتەردىڭ سۇراقتارىنا جاۋاپ بەردى. ەلىمىزدىڭ قۇقىق سالاسىنداعى تاجىريبەلەرىن امەريكا, يتاليا قىلمىستىق ادىلەت جۇيەسىمەن سالىستىرا اتاپ ءوتتى.
«قىلمىستىق سوت ءوندىرىسىنىڭ ماسەلەلەرى مەن ولاردى شەشۋ جولدارى تۋرالى كاسىبي ماماننىڭ تالداۋى ستۋدەنتتەر ءۇشىن قىزىقتى بولدى. قازاقستانداعى قۇقىق قورعاۋ جۇيەسىن ناقتى مىسالدارمەن ءتۇسىندىرىپ بەرگەن ساراپشىنىڭ لەكتسياسى ارى قاراي دا جالعاسىن تاباتىن بولادى. ستۋدەنتتەردىڭ تەوريالىق ءبىلىمىن ءوز ءىسىنىڭ كاسىپقويى, بىلىكتى مامانداردىڭ وسىنداي دارىستەرى ارقىلى تولىقتىرىپ وتىرۋ ماڭىزدى» دەيدى پروفەسسور گۇلميرا سۇلتانباەۆا.
اكادەميك م. قوعاموۆ سونىمەن قاتار قىزمەتتە تابىستى بولۋدىڭ قىر-سىرىمەن ءبولىستى. ونىڭ ايتۋىنشا, جۇمىس قانشالىقتى ساپالى بولعان سايىن, ونىمدىلىگى دە ارتا تۇسەدى. سوندىقتان كەز كەلگەن ءىستى ساپالى ەتۋدە جان جاقتى تاجىريبەلەردى قاراستىرۋ, وزىق ادىستەردى مەڭگەرۋ باستى ماقسات سانالادى.
دارىستەن كەيىن پىكىرلەرىمەن بولىسكەن 3-كۋرس ستۋدەنتى ەللادا ساماتوۆا, ينديرا حاسانوۆا, التىناي فەۆرالەۆا, تاعى دا باسقا ستۋدەنتتەر قىلمىستىق ءىس جۇرگىزۋدىڭ وزەكتى ماسەلەلەرى مەن قۇقىقتىق جۇيەدەگى رەفورمالار تۋرالى اقپاراتقا قانىق بولىپ, سوت ءوندىرىسىنىڭ ماسەلەلەرى مەن شەشۋ جولدارى تۋرالى كاسىبي ماماننان ءدارىس الۋدىڭ بارىنشا پايدالى بولعانىن اتاپ ءوتتى.