تاتۋ دارەت پەن نامازعا كەدەرگى ەمەس, دەگەنمەن يسلام دىنىندە ونى دەنەگە سالۋ ۇلكەن كۇنا بولىپ ەسەپتەلەدى. بۇل تۋرالى قازاقستان مۇسىلماندارى ءدىني باسقارماسىنىڭ عۇلامالار كەڭەسى مالىمدەمە جاسادى, دەپ حابارلايدى Egemen.kz.
«تاتۋيروۆكا – تەرى استىنا بوياۋىشتاردى ەندىرۋ جولىمەن سالىناتىن ادام دەنەسىندەگى سۋرەت. عۇلامالار تاتۋيروۆكانىڭ حارام ەكەندىگىنە ءبىراۋىزدان كەلىسكەن. ول – ۇلكەن كۇنا. ويتكەنى ول اللانىڭ جاراتىلىسىن وزگەرتۋ, كوزبوياۋشىلىق, قاننىڭ ارالاسۋى سەبەپتى ءناجىس بوياۋمەن بوياۋ, دەنەگە زيان بەرۋ بولىپ سانالادى», دەلىنگەن رەسمي حابارلامادا.
سونداي-اق عۇلامالار كەڭەسى دەنەگە سۋرەت سالۋعا تىيىم سالىناتىنىن, مۇمكىندىك بولسا ونى كەتىرۋ كەرەكتىگىن العا تارتادى.
«تاۋبە ەتىپ, سۋرەتتى مۇمكىندىك بولسا كەتىرۋى كەرەك. تاتۋيروۆكانى كەتىرۋ دەنساۋلىققا زيان بولسا, ونى قالدىرۋدىڭ وقاسى جوق. ول دارەتكە, نامازعا جانە يمامدىققا كەدەرگى بولمايدى», دەيدى ءمۇفتيات.