5 جىل بۇرىن قۇرىلىسى توقتاپ قالعان قىزىلوردا سۋ تورابىن جاڭعىرتۋ جوباسى اياقتالدى, دەپ حابارلايدى Egemen.kz.
نىسان 2022 جىلى قولدانىسقا بەرىلۋى كەرەك ەدى. الايدا, پاندەميا مەن قارجىلىق قيىندىقتارعا بايلانىستى قۇرىلىس جۇمىستارى توقتاپ قالعان بولاتىن.
سۋ رەسۋرستارى جانە يرريگاتسيا مينيسترلىگى قۇرىلعاننان كەيىن قىزىلوردا سۋ تورابىنىڭ قۇرىلىسى قايتا جانداندى. نىساننىڭ ساپالى جۇمىسىن قامتاماسىز ەتۋ ماقساتىندا گيدراۆليكالىق توراپتىڭ بۇزىلعان بولشەكتەرى قايتا جوندەلىپ, باسقا دا اقاۋلارى دۇرىستالدى.
ايتا كەتەيىك, سۋ تورابى سىرداريا وزەنىنىڭ سول جانە وڭ جاعالاۋىنداعى 120 مىڭ گەكتارعا جۋىق جەردى سۋارۋعا جانە شامامەن 2 ملن گەكتارعا جۋىق ءشولدى ايماقتى ىلعالداندىرۋعا ارنالعان.
«قۇرىلىسى توقتاپ قالعان نەمەسە سوزىلىپ كەتكەن جوبالاردى اياقتاۋ ماسەلەسى مينيسترلىكتىڭ ءجىتى باقىلاۋىندا. ماسەلەن, اقتوبە سۋ قويماسىنا 36 جىلدا العاش رەت كەشەندى رەكونسترۋكتسيا جاسالدى. ال, باتىس قازاقستان وبلىسىندا سوڭعى 58 جىلدا ءبىرىنشى رەت كيروۆ سۋ قويماسى جوندەلدى. بۇگىنگى تاڭدا ەسقۇلا, تالاپ, پرەسنوۆسكي جانە سوكولوۆسكي تاپتىق سۋ قۇبىرلارىنىڭ قۇرىلىسىن اياقتاۋ بويىنشا دا بەلسەندى جۇمىس ءجۇرىپ جاتىر. بۇل جوبالار حالىقتى ساپالى سۋمەن قامتاماسىز ەتۋگە باعىتتالعان. سول سەبەپتى اتالعان جوبالاردى ىسكە اسىرىپ, مەجەسىنە جەتكىزۋ وتە ماڭىزدى», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.