اتالعان كولەمدەگى سۋدى الۋ ءساۋىر ايىنا دەيىن جۇزەگە اسىرىلادى, دەپ حابارلايدى Egemen.kz.
سالا ۆەدومستۆوسىنىڭ ءباسپاسوز قىزمەتىنىڭ مالىمدەۋىنشە سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ وسى جونىندە كەلىسىمگە كەلدى. دۋشانبە قالاسىندا ورتالىق ازيانىڭ مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ (مسشۇك) 88-ءشى وتىرىسى ءوتىپ, وعان قازاقستان, وزبەكستان, تاجىكستان, تۇرىكمەنستان سۋ شارۋاشىلىعى ۆەدومستۆولارىنىڭ باسشىلارى قاتىستى.
تاراپتار سىرداريا جانە ءامۋداريا وزەندەرى باسسەيندەرىندە ۆەگەتاتسيا ارالىق كەزەڭنىڭ ءوتۋ بارىسىن قاراستىرعان. ايتا كەتسەك, كەلىسىلگەن سۋ كولەمى سىرداريا وزەنى ارقىلى تۇركىستان وبلىسىنىڭ شاردارا سۋ قويماسىنا كەلەدى. ونىڭ ىشىندە 1,6 ملرد تەكشە مەتر سۋ ارال تەڭىزىنە جىبەرىلمەك.
«بۇل بيىل سۋارۋ كەزەڭى ءۇشىن قاجەت سۋ كولەمىن جيناۋعا, سونداي-اق قازاقستاننىڭ وڭتۇستىك وبلىستارىنداعى ەكوجۇيەنى ساقتاۋ ءىس-شارالارىن جۇزەگە اسىرۋعا مۇمكىندىك بەرەدى. ەلىمىزدىڭ وڭتۇستىگىندەگى جاعداي باتىس پەن سولتۇستىكتەن وزگەشە ەكەنىن اتاپ وتەمىن. مۇندا ۇلكەن كولەمدەگى سۋ تاسقىنى بولعان جوق. ال جازدا سۋارمالى سۋعا دەگەن سۇرانىس وتە جوعارى. سوندىقتان دا ءبىز وڭتۇستىكتى سۋمەن قامتاماسىز ەتۋ بويىنشا مۇلدەم باسقا جۇمىس جۇرگىزىپ جاتىرمىز. سۋ ديپلوماتياسى – ءبىزدىڭ مينيسترلىك جۇمىسىنىڭ ماڭىزدى باعىتى. وسى كەلىسسوزدەردىڭ ناتيجەسىندە وتكەن جىلى ەلىمىزدىڭ وڭتۇستىگىن سۋمەن تۇراقتى قامتاماسىز ەتتىك. ءبىز سۋ ءبولۋ جانە ترانسشەكارالىق سۋ نىساندارىن قورعاۋ جونىندەگى بارلىق ماسەلەلەردى ورتالىق ازيا ەلدەرىندەگى ارىپتەستەرىمىزبەن بىرلەسە وتىرىپ شەشەمىز», دەدى مينيستر نۇرجان نۇرجىگىتوۆ.