الماتىدا الداعى 31 قاڭتار مەن 1 اقپان ارالىعىندا «Digital Almaty 2025: Industrial AI: جاڭا داۋىرگە ارنالعان تەحنولوگيالار» اتتى حالىقارالىق تسيفرلىق فورۋم وتەدى.
بيىل جەتىنشى رەت وتەتىن فورۋمدا ەۋرازيالىق ەكونوميكالىق وداق ەلدەرىنىڭ يننوۆاتسيالىق دامۋ كەلەشەگى تالقىلانادى. تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى جاساندى ينتەللەكت جانە يننوۆاتسيالاردى دامىتۋ كوميتەتىنىڭ توراعاسى عيززات بايتۇرسىنوۆ ورتالىق كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا تسيفرلىق فورۋم بارىسىندا جاساندى ينتەللەكتىنىڭ ونەركاسىپتىك ەكوجۇيەلەرگە ينتەگراتسيالاۋىنا قاتىستى كەڭ كولەمدە اقپارات ۇسىنىلاتىنىن ايتتى.
سونداي-اق فورۋمنىڭ رەسمي ءبولىمى ەاەو ەلدەرى پرەمەر-مينيسترلەرىنىڭ ءداستۇرلى پلەنارلىق وتىرىسىمەن باستالادى. فورۋمعا ازەربايجان, بەلارۋس, قىرعىزستان, رەسەي, تاجىكستان, وزبەكستان, ارمەنيا, يران ۇكىمەتتەرىنىڭ باسشىلارى, سونداي-اق ەۋرازيالىق ەكونوميكالىق كوميسسيا باسشىلارى قاتىسادى. ۇكىمەت باسشىلارى تسيفرلاندىرۋدىڭ نەگىزگى جوبالارى, جاساندى ينتەللەكتىنى ەنگىزۋ جانە تەحنولوگيالىق دامۋدىڭ بىرلەسكەن ۆەكتورلارىنا بايلانىستى مەملەكەتتەر اراسىنداعى ماسەلەلەردى تالقىلايدى.
يننوۆاتسيالىق تەحنولوگيالار پاركىنىڭ باسقارۋشى ديرەكتورى دانيا احمەتوۆانىڭ ايتۋىنشا, «Digital Almaty 2025» فورۋمى جاساندى ينتەللەكتىنى دامىتۋ بويىنشا يدەيالار مەن جوبالاردى ۇسىناتىن نەگىزگى الاڭعا اينالماق. وعان قاتىسۋشىلار ەكونوميكانى دامىتۋ ءۇشىن وزىق تەحنولوگيالارمەن تانىسىپ, ونەركاسىپتىك ەكوجۇيەلەر, قارجى سالاسى, ESG, مەديتسينا, ءبىلىم جانە كيبەرقاۋىپسىزدىك جۇيەسىنە AI قۇرالدارىن ينتەگراتسيالاۋدىڭ كەڭ مۇمكىندىگىن قاراستىرادى.
سونىمەن قاتار فورۋم اياسىندا ءداستۇرلى «Digital Awards 2025» سىيلىعى تابىستالادى. تسيفرلىق كەڭەستىكتە ەكى كۇن بويى 60 مىڭ دوللاردى ەنشىلەۋ ءۇشىن ستارتاپتار اراسىندا «AI Battle» بايقاۋى وتەدى. جاساندى ينتەللەكت سالاسىنداعى ەلەۋلى جەتىستىكتەر اتالىپ, «AI Movement» باستاماسىنىڭ قورىتىندىسى جاريا ەتىلەدى.
الماتى