بۇل تۋرالى مەملەكەت باسشىسى قاسىم-جومارت توقاەۆ ۇكىمەتتىڭ كەڭەيتىلگەن وتىرىسىنداعى قورىتىندى سوزىندە ايتتى, دەپ حابارلايدى Egemen.kz.
پرەزيدەنتتىڭ ايتۋىنشا, ۇكىمەت ينۆەستيتسيا سالاسىنداعى جۇمىستى كۇشەيتۋى قاجەت. ايتپەسە, ينۆەستيتسيا نارىعىنداعى باسەكەلەستىك قىزىپ تۇرعان كەزەڭدە زامان اعىمىنان كەش قالامىز.
«بىزگە ساپالى ينۆەستيتسيا قاجەت ەكەنى انىق. وزىق تەحنولوگياعا نەگىزدەلگەن جانە سىرتقى نارىققا ارنالعان جوبالاردى ادەتتە شەتەل ينۆەستورلارى ۇسىنادى. بىلتىرعى 9 ايدا ەلىمىزگە 12,7 ميلليارد دوللار تىكەلەي شەتەل ينۆەستيتسياسى تارتىلدى. بۇل 2023 جىلدىڭ ءدال سونداي كەزەڭىمەن سالىستىرعاندا 36 پايىزعا كەم», دەدى پرەزيدەنت.
سونىمەن قاتار اقتوبە, الماتى, اتىراۋ, شىعىس قازاقستان, جامبىل, پاۆلودار, سولتۇستىك قازاقستان وبلىستارىندا جانە الماتى قالاسىندا تىكەلەي شەتەل ينۆەستيتسياسىن تارتۋ قارقىنى تومەندەگەن. ال جەكە ينۆەستيتسيانىڭ ازايۋى بيۋدجەت ەسەبىنەن وتەلىپ جاتىر. بىراق مۇنداي شارامەن ۇزاققا بارا المايمىز.
«قازىر بيۋدجەت تاپشىلىعى بار ەكەنىن بىلەسىزدەر. سوندىقتان ساپالى ينۆەستيتسيا اكەلەتىن جاۋاپكەرشىلىگى جوعارى ينۆەستورلارعا قوسىمشا جەڭىلدىكتەر بەرۋ ماسەلەسىن قاراستىرعان ءجون. مۇنداي ساياسات مەنىڭ ەل ەكونوميكاسىن ىرىقتاندىرۋ تۋرالى ستراتەگياما تولىق ساي كەلەدى. بۇل – ماڭىزدى ءسات», دەدى ق.توقاەۆ.
سونداي-اق پرەزيدەنت ۇكىمەتكە ينۆەستوردى ىزدەۋگە, قولداۋعا جانە قورعاۋعا قاتىستى جۇمىستىڭ ءبارىن جۇيەلى جۇرگىزەتىن ءبىرتۇتاس ەكوجۇيە قۇرۋى قاجەت ەكەنىن ايتتى.
«بۇل جۇمىس بارلىق دەڭگەيدە, ياعني ايماقتا, ورتالىقتا جانە شەتەلدە بىردەي اتقارىلۋى كەرەك. وسى ورايدا شەتەلدىك جانە وتاندىق ينۆەستورلارعا قاتىستى ۇستانىم بىردەي بولۋى قاجەت. مەملەكەتتىڭ قولداۋىنا يە بولعان كومپانيالارعا ءتيىستى تالاپ قويىلۋى كەرەك. ولار جۇمىس ورىندارىن ساقتاۋعا, ءوندىرىستى جاڭعىرتۋعا ءتيىس. سونىمەن بىرگە ەكولوگيا تالاپتارىن مۇلتىكسىز ورىنداۋعا مىندەتتى», دەدى ەل پرەزيدەنتى.