بۇگىن ەلوردادا مەملەكەت باسشىسىنىڭ توراعالىعىمەن ءوتىپ جاتقان ۇكىمەتتىڭ كەڭەيتىلگەن وتىرىسىندا ولجاس بەكتەنوۆ بايانداما جاساپ, قازاقستاننىڭ ونەركاسىپتىك الەۋەتىنە توقتالدى, دەپ جازادى Egemen.kz.
ۇكىمەت باسشىسىنىڭ 2024 جىلى قازمۇنايگاز قىزىلوردا, اتىراۋ جانە اقتوبە وبلىستارىندا ءتورت جوبا بويىنشا بۇرعىلاۋ جۇمىستارى باستاعانىن اتاپ ءوتتى. بۇل جوبالاردىڭ جيىنتىق گەولوگيالىق رەسۋرستارى مۇناي ەكۆيۆالەنتى بويىنشا 800 ميلليون توننادان اسادى.
سونىمەن قاتار بيىل العاشقى وتانندىق تاقتاتاس مۇنايى وندىرىلەدى دەپ كۇتىلەدى. بۇل مۇناي مەن گاز سالاسىنا ينۆەستيتسيالار تارتۋ ءۇشىن قوسىمشا سەرپىن بەرمەك.
«شيكىزات قورى شامامەن 19 ملرد تەكشە مەتر گازدى قۇرايتىن «باتىس پرورۆا» جانە «بارحاننايا» كەن ورىندارىندا گاز ءوندىرۋ جۇمىستارى باستالادى. قاراعاندى وبلىسىندا جەردە سيرەك كەزدەسەتىن مەتالداردىڭ 17 ءتۇرى بار ءىرى كەن ورنى تابىلدى. سونىمەن قاتار وسى قاراعاندى وبلىسىندا ەلەكتروموبيلدەرگە ارنالعان باتارەيالار وندىرىسىندە قولدانىلاتىن گرافيت كونتسەنتراتىن ءوندىرۋ بويىنشا تەحنيكالىق-ەكونوميكالىق نەگىزدەمە ازىرلەنىپ جاتىر», دەدى ولجاس بەكتەنوۆ.
ولجاس بەكتەنوۆ قاشاعان مەن جاڭاوزەندە گاز وڭدەۋ زاۋىتتارىنىڭ قۇرىلىسى ءالى دە جالعاسىپ جاتقانىن ايتتى.
«قاشاعانداعى ەكىنشى گاز وڭدەۋ زاۋىتى مەن قاراشىعاناقتاعى گاز وڭدەۋ زاۋىتىنىڭ جوبالاۋ جۇمىستارىن باستاۋ ءۇشىن ينۆەستيتسيالىق شەشىمدەردىڭ قابىلدانۋىن كۇتىپ وتىرمىز», دەدى ۇكىمەت باسشىسى.
بۇعان قوسى ولجاس بەكتەنوۆ جالپى ۇكىمەتتىڭ باقىلاۋىندا ەكى جۇزدەن استام پەرسپەكتيۆالى جوبا تۇرعانىن تىلگە تيەك ەتتى.
«الايدا, جەكەلەگەن وڭ ناتيجەلەرگە قاراماستان, قازىرگى ەكونوميكالىق ءوسۋ قارقىنى باياۋ ەكەنىن كورىپ وتىرمىز. قازاقستاننىڭ ونەركاسىپتىك الەۋەتى بۇدان الدەقايدا جوعارى. ول مەن ايتقان جوبالاردان دا كوپ بولۋعا ءتيىس. بىراق ول ءۇشىن ەلىمىز قوماقتى ينۆەستيتسيالىق كاپيتال جاساقتاپ الۋى كەرەك», دەدى و.بەكتەنوۆ.