سيەتلدىڭ اۋداندىق سوتى دونالد ترامپتىڭ اقش-تا ومىرگە كەلگەن بالالارعا ازاماتتىق بەرۋدى شەكتەيتىن جارلىعىنىڭ كۇشىن ۋاقىتشا توقتاتتى. 22 شتات, سونداي-اق سان-فرانتسيسكو قالاسى مەن كولۋمبيا وكرۋگىنىڭ باس پروكۋرورلارى ترامپتىڭ جارلىعىنا توسقاۋىل قويۋدى تالاپ ەتىپ, سوتقا شاعىم تۇسىرگەن, دەپ حابارلايدى Egemen.kz DW باسىلىمىنا سىلتەمە جاساپ.
سوت شەشىمى ۆاشينگتون, يللينويس, ورەگون جانە اريزونا شتاتتارىنىڭ وكىلدەرىنىڭ تالابىن قاناعاتتاندىردى, ولار بۇل جارلىق اقش كونستيتۋتسياسىنىڭ 1868 جىلى قابىلدانعان 14-ءشى تۇزەتۋىن بۇزدى دەپ مالىمدەگەن.
ەستەرىڭىزگە سالا كەتەيىك, بۇعان دەيىن ترامپ تۋ قۇقىعى بويىنشا ازاماتتىق الۋدى شەكتەيتىن جارلىققا قول قويعان بولاتىن. جارلىق فەدەرالدى اگەنتتىكتەردىڭ اقش ازاماتتارىنا ەلدە زاڭسىز جۇرگەن اتا-انادان تۋىلعان نەمەسە انالارى اقش-تا ۋاقىتشا تۇراتىن بالالارعا ارنالعان قۇجاتتاردى بەرۋىنە تىيىم سالادى.
بۇقارالىق اقپارات قۇرالدارى 30 كۇننەن كەيىن كۇشىنە ەنەتىن بۇل قادام سوتتا داۋ تۋدىرۋى مۇمكىن ەكەنىن اتاپ ءوتتى, ويتكەنى بۇل اقش كونستيتۋتسياسىنىڭ 14-ءشى تۇزەتۋىنە قايشى كەلەدى. وسىعان بايلانىستى قۇقىق قورعاۋشىلار اقش پرەزيدەنتىنىڭ اكىمشىلىگىن سوتقا بەرگەن.