«ادامنىڭ جان دۇنيەسىن اقتارۋ ءۇشىن وعان ءان ايتقىزۋ كەرەك», دەپتى نازىم حيكمەت. شىنىندا, شىن ونەر – تازالىقتىڭ سيمۆولى. اقىن ءسوزىنىڭ ارعى جاعىندا سول ونەردىڭ قۇدىرەتى, وعان بەت بۇرعان ادامنىڭ كىرشىكسىز نيەتى جاتىر دەسەك جاراسار. ال وسى ونەرگە بەت بۇرعان جاس ۇرپاقتىڭ جەتىستىگىن اتاپ, وعان ورتاق بولۋ, ءىلتيپات ءبىلدىرۋ دە جاقسىلىق نىشانى.
سونىڭ ءبىر دالەلىندەي استانا قالاسىنداعى №2 ونەر مەكتەبىنىڭ مۇعالىمدەرى مەن وقۋشىلارى اركەز ونەر بيىگىنەن كورىنىپ كەلەدى. ولار تاياۋدا عانا تۇركيا مەملەكەتىنىڭ كەمەر قالاسىندا تەاتر ونەرى, ەسترادالىق ءان ايتۋ نوميناتسيالارى بويىنشا وتكەن «International art festival» اتتى حالىقارالىق بالالار بايقاۋ-فەستيۆالىنە قاتىسىپ, رەسەي, بەلارۋس, ماكەدونيا مەملەكەتتەرىنەن جينالعان 400 ۇمىتكەردىڭ اراسىنان توپ جارىپ جۇلدەلى ورىننان كورىنىپتى.
مىسالى, گ.قايىربەكوۆا جەتەكشىلىك ەتەتىن «ونەرلى ورەندەر» بالالار تەاترى «ارىستان پاتشا» ەرتەگىسىن كورسەتىپ, ءبىرىنشى ورىن الىپتى. ەرتەگىدەگى ءرولدەردى كەلىستىرىپ ساحناعا شىعارعان ارۋجان قىزىر, ەكپىن ەرنار, جارىلقاسىن ازامات, دانا نۇرلانقىزى كورەرمەندەردىڭ كوزايىمىنا اينالىپتى. ال ەسترادالىق ۆوكالدان 5-7 جاستاعىلار اراسىندا وتكەن بايقاۋدا ا.تىنىباەۆا, د.قاسىمبەك ءۇشىنشى, ءبىرىنشى ورىندى, ال ن.كەنجەبەكقىزى باس ءجۇلدەنى يەلەنىپتى. «اينالايىن» بالالار قورى ەكىنشى ورىنعا قول جەتكىزىپتى.
بۇل مەكتەپتىڭ «اينالايىن» بالالار حورى 2010 جىلى فرانتسيادا ءوتىپ, التى مەملەكەت وكىلدەرى قاتىسقان فەستيۆالدە ءبىرىنشى ورىندى يەلەنسە, ودان كەيىن ءتۇركيانىڭ بارتين قالاسىندا وتكەن وقۋشىلاردىڭ ونەر جارىسىندا ءبارى دەرلىك لاۋرەات اتانىپ قايتىپتى. 2013 جىلى «قۋىرشاق» تەاترى وقۋشىلارى تۇركيانىڭ بيۋيۋك قالاسىندا وتكەن حالىقارالىق فەستيۆال ءجۇلدەسىن الىپ, ابىرويمەن وتانىمىزعا ورالىپتى.
«ءبىزدىڭ جاس تالانتتارىمىز ۇلتتىق بيدەن, بالالارعا ارنالعان ەرتەگى تەاترىنداعى قويىلىمداردان, ۇلت اسپاپتارىنا ارنالعان نوميناتسيالاردان الدىڭعى ورىننان كورىنىپ, اركەز ءبىرىنشى, ەكىنشى جۇلدەنى يەلەنىپ كەلەدى», دەيدى مەكتەپ ديرەكتورى گۇلميرا جانگەلدى.
سۇلەيمەن مامەت,
«ەگەمەن قازاقستان».