قازاقستاندا مەكتەپكە دەيىنگى ءبىلىم بەرۋ سالاسىندا ۆاۋچەرلىك قارجىلاندىرۋدى ەنگىزۋ ۇدەرىسى جاڭا وڭىرلەردى قامتي وتىرىپ جانە مەكتەپ جاسىنا دەيىنگى بالالار ءۇشىن قىزمەتتەردىڭ قولجەتىمدىلىگىن جاقسارتۋ ارقىلى قارقىن الىپ كەلەدى. جۇيە تاراز, شىمكەنت, تۇركىستان, استانا جانە ورال قالالارىندا ءساتتى جۇزەگە اسىرىلىپ جاتىر.
جامبىل وبلىسى – ۆاۋچەرلىك قارجىلاندىرۋدى اۋداندىق دەڭگەيدە ەنگىزگەن العاشقى ءوڭىر. باعدارلاما بايزاق اۋدانىندا قاناتقاقتى رەجىمدە ىسكە قوسىلىپ, مۇندا 650-دەن استام ۆاۋچەر بەرىلدى. ايدىڭ سوڭىنا دەيىن جۇيە بارلىق اۋداندى قامتيدى.
جوبانىڭ ماڭىزدى جەتىستىكتەرىنىڭ ءبىرى – بالاباقشا ورىندارىنا «كەزەككە تۇرۋ» ماسەلەسىنىڭ جويىلۋى. سەبەبى ۆاۋچەر الۋ كەزەگى تەك العا جىلجيدى, بۇل بارلىق وتباسىنا تەڭ جاعداي تۋعىزادى. تاراز بەن تۇركىستاندا ەكى جاستان اسقان بالالارعا ارنالعان كەزەك تولىعىمەن جويىلدى, ال شىمكەنت پەن ورالدا كەزەكتى ازايتۋ بويىنشا وڭ ديناميكا بايقالدى.
تارازدىڭ ءساتتى تاجىريبەسى ماڭىزدى شەشىم قابىلداۋعا مۇمكىندىك بەردى – ۆاۋچەرلەردى 1,5 جاستان باستاپ بەرۋ قاراستىرىلدى. بۇل قادام مەكتەپكە دەيىنگى ەرتە ءبىلىم الۋ مۇمكىندىكتەرىن ايتارلىقتاي كەڭەيتەدى, اتا-انالارعا بالالارىن ءبىلىم بەرۋ ۇيىمدارىندا ەرتەرەك وقىتۋعا مۇمكىندىك بەرەدى.
سونىمەن قاتار ۆاۋچەرلىك قارجىلاندىرۋدىڭ وڭىرلەردە كەڭەيۋى مەكتەپكە دەيىنگى ءبىلىم بەرۋدىڭ قولجەتىمدىلىگى مەن ساپاسىن ارتتىرىپ, اتا-انالار مەن ءبىلىم بەرۋ ۇيىمدارى ءۇشىن اشىق ءارى ىڭعايلى جۇيە قالىپتاستىرادى. جاڭا جۇيە اتا-انالارعا بالاباقشانى تاڭداۋ ەركىندىگىن بەرەدى ءارى مەكەمەلەر اراسىندا اۋىسۋدى ۆاۋچەردى ساقتاپ قالۋ ارقىلى جۇزەگە اسىرۋعا مۇمكىندىك تۋعىزادى. بۇل ءبىلىم بەرۋ مەكەمەلەرىن ءوز قىزمەتتەرىنىڭ ساپاسىن ارتتىرۋعا ىنتالاندىرادى.
بيزنەس-ۇدەرىستەردى اۆتوماتتاندىرۋ جانە قاعازباستىلىقتان باس تارتۋ باعدارلامانى باسقارۋدى ايتارلىقتاي جەڭىلدەتىپ, جۇيەنىڭ اشىقتىعىن تولىق قامتاماسىز ەتتى. ءار بالانىڭ «تسيفرلىق پورترەتىن» جۇرگىزۋ ارقىلى ۆاۋچەرلەردىڭ قوزعالىسىن باقىلاۋ جانە مەملەكەتتىك قارجىنىڭ ماقساتسىز جۇمسالۋىنىڭ الدىن الۋ مۇمكىندىگى پايدا بولدى.