«ەگەمەن قازاقستاننىڭ» مەنشىكتى ءتىلشىسى گۇلايىم شىنتەمىرقىزىنىڭ 27 مامىرداعى «سەنى قالاي قورعايمىز, ءبۇلدىرشىن قىز؟» اتتى ماقالاسىن وقىعان ءاربىر اتا-انا, بۇكىل ەل, تەك ءبىزدىڭ ەلدە ەمەس, بۇكىل دۇنيەجۇزىندە ورىن الىپ وتىرعان وسىناۋ جانتۇرشىگەرلىك وقيعانى – بۇلدىرشىندەردى زورلاۋ مەن قورلاۋدى ايۋاندىقپەن ىسكە اسىرىپ جۇرگەن ازعىندار – پەدوفيلدەردى تۇزاققا ءتۇسىرۋ جونىندە اشىنعان جانايقايلارىن جەتكىزۋدە. قورقىنىشتىسى سول – بۇل ماقالا شىققاننان بەرگى ءبىر ايعا جەتپەيتىن از ۋاقىتتىڭ ىشىندە ەلىمىزدىڭ بىرقاتار وڭىرلەرىندە پەدوفيليا كورىنىستەرى ورىن الدى.
ادام دەپ اتاۋعا بولمايتىن, ءتىپتى, حايۋاندار دا ءوز تۇقىمداستارىنا ىستەمەيتىن مۇنداي اسا سۇمدىق ارەكەتتەردى ىسكە اسىرۋشى پەدوفيلدەر دەگەن كىمدەر, بۇل لاعنەت اتقان ءسوز قايدان شىققان دەگەن ويمەن قولىمدا بار بارلىق سوزدىكتەردى قاراپ شىقتىم. الگى اتى وشكىر ءسوز ول كىتاپتاردىڭ بىردە-بىرىندە بولماي شىقتى. سوزدىكتەردى جاساۋشىلار بۇل ءسوزدى بىلمەگەن نەمەسە ءتارجىمالاي الماعان دەي المايمىز. وسىعان قاراعاندا, قاسقىردى قاسقىر دەسە كوبەيىپ كەتەدى دەپ قورقىپ, ءبورى دەپ اتاۋدى ۇسىنىپ وتىراتىن اتالارىمىز ءتارىزدى الگى جەكسۇرىن ءسوزدى ادەيى اۋىزدارىنا المادى-اۋ دەپ ويلايمىن. قالاي دەگەندە دە, پەدوفيلدەردىڭ بارلىق جەردە, الەمنىڭ بارلىق ەلىندە اش, قورقاۋ قاسقىرلارداي ءورىپ جۇرگەندەرى قورقىنىشتى-اق.
بۇل كەساپاتقا توسقاۋىل بولارلىق كۇشتەردىڭ السىزدىگىنەن, قازىر عانا جايناپ ءوسىپ-وركەندەپ, ۇل-قىز ءوسىرىپ وتىرعان وتباسىنىڭ ءبىر مەزەتتە جانە ويدا جوق جەردەن ورنى تولماس قاسىرەت-قايعىعا ۇشىراۋىنىڭ جيىلەۋىنەن حالىقتىڭ ۇرەيى وسە تۇسۋدە. وسىدان بارىپ جاس ۇرپاقتىڭ ومىرگە دەگەن كوزقاراسى, بۇكىل سانا-سەزىمى ۋلانۋدا. جاستاردىڭ وزىنە ءوزى قول جۇمساۋلارىنىڭ ءبىر سەبەبى دە ۇرەيلى ومىرىنەن تۋىنداپ وتىر دەپ بىلۋگە بولادى. اتا-انالار ءتيىستى قامقورلىقتى زاڭ شىعارۋشى ورگانداردان كۇتەدى.
دۇيسەنبى ارىپ ۇلى,
ماڭعىستاۋ وبلىسىنىڭ قۇرمەتتى ازاماتى.
اقتاۋ.