«مارى مەرەيى»

بىلتىر قازاندا وتكەن تۇرسكوي تۇراقتى كەڭەسىنىڭ 32-ءشى وتىرىسىندا  تۇرىكمەنستاننىڭ مارى قالاسى – 2015 جىلدىڭ تۇركى دۇنيەسىنىڭ مادەني باس قالاسى بولىپ بەكىتىلگەن ەدى. وسىعان وراي, جاقىندا قازاننان كەلەسى ەستافەتانى العان مارى قالاسىندا «مارى – تۇركى دۇنيەسىنىڭ مادەني باس قالاسى-2015» جىلىنىڭ سالتاناتتى اشىلۋ ءراسىمى ءوتتى.

مارىداعى «رۋحىەت» مەملەكەت­تىك سارايىندا وتكەن شاراعا تۇرىك­مەنستاننىڭ پارلامەنت دەپۋتات­تارى, تۇركىتىلدەس ەلدەردىڭ مادەنيەت ۆەدوم­ستۆولارى مەن قوعامدىق ۇيىم­دارىنىڭ وكىلدەرى, عالىمدار مەن مادەنيەت قايراتكەرلەرى, جۋرناليس­تەر مەن جاستار قاتىستى.  سونداي-اق, حالىقارالىق تۇركسوي ۇيىمى­نىڭ وكىلدەرى مەن قازاقستان, ازەرباي­جان, قىرعىزستان, تۇركيا, ماكەدو­نيا, بوسنيا مەن گەرتسەگوۆينا, ۆەنگريا, بولگاريا, گاگاۋزيا (مول­دوۆا رەسپۋبليكاسى), رەسەي فەدەراتسيا­سىنىڭ قۇرامىنداعى تاتارستان, باشقۇرتستان, حاكاسيا, تىۆا, ساحا-ياكۋتيا, كالماق, التاي سىندى تۇركى الەمىنىڭ تۇكپىر-تۇكپىرىنەن شىعارماشىلىق ۇيىمدار دا بولدى. شارانىڭ سالتاناتتى اشىلۋ راسىمىنە ارنايى سالەم حات جولداعان تۇرىكمەنستان پرەزيدەنتى گۋربانگۋلى بەردىمۇحاممەدوۆ تاريحي شاراعا قاتىسىپ وتىرعان بارلىق قوناقتاردى ايتۋلى مەرەكەمەن قۇتتىقتاپ, ادامزات وركەنيەتىنىڭ تاريحىندا ەلەۋلى ورنى بار ەجەلگى مارى قالاسىنىڭ تۇركى دۇنيەسىندەگى ءمانىن اشىپ, تۇرىكمەن حالقىنىڭ ەجەلدەن كەلە جاتقان سالت-ءداستۇرى, ونەرى مەن مادەنيەتى الەم حالىقتارىنىڭ جاقىنداسۋىنا قىزمەت ەتەتىندىگىن تىلگە تيەك ەتكەن. مەرەكەلىك شارانىڭ تاريحي­ ماڭىزدىلىعىن بايان ەتكەن تۇركسوي-دىڭ باس حاتشىسى ءدۇي­سەن قا­سەيىنوۆ تۇرىكمەنستان پرەزي­دەن­تىنە حالىقارالىق شارانىڭ وتۋىنە قولداۋ كورسەتىپ, تۇركى دۇنيە­سىنىڭ ونەر مەن مادەنيەت سالاسىنا قوسقان سۇبەلى ۇلەسى ءۇشىن العىس ءبىلدىردى. «بۇگىنگى كۇنى «تۇركى دۇنيەسىنىڭ مادەني باس قالاسى» جوباسىنىڭ اياسىندا ەستافەتانى قابىلداپ العان ەجەلگى مارى قالاسى يۋنەسكو-نىڭ بۇكىلالەمدىك تىزىمىنە ەنگەنى بارشاعا ءمالىم. وسى قاسيەتتى جەردە الەمدىك وركەنيەتتىڭ ورتالىقتارى مەن جالپى مادەني مۇرانىڭ قۇندىلىقتارىن سەزىنۋگە بولادى.  سوندىقتان مارى قالاسىنىڭ تەڭدەسسىز مادەني مۇراسى تۇركى دۇنيەسىنە ورتالىق بولۋعا ابدەن لايىقتى», – دەپ شارانىڭ ءمانىن تەرەڭدەتە ءتۇستى باس حاتشى. شارا شەڭبەرىندە وتكەن كونتسەرتكە ەلىمىزدىڭ تالانتتى ونەر­پاز­دارى ءوز ۇلەستەرىن قوستى. «اق-جايىق» ءانسامبلىنىڭ ت.اقبوكەن, ا.نوعايباەۆا, ءا.نابيەۆا, ا.ەر­جانوۆا, ت.جۇماعاليەۆ, گ.جۇما­تاەۆا, ا.جالعاپوۆ, ب.اقتاەۆ, ە.باي­مۇراتوۆ, س.بايمەنوۆا ەسىمدى ونەر­پازدارى قازاقتىڭ ءداستۇرلى مۋزى­كاسىمەن قوناقتاردى ءتانتى ەتتى. اسىرەسە, بەلگىلى دومبىراشى تەمىر اقبوكەننىڭ تۇرىكمەننىڭ ۇلتتىق اسپابى دۋتارمەن قازاقتىڭ كۇيلەرىنەن پوپپۋري ورىنداعاندا تۇرىكمەن جۇرتشىلىعى ءدان ريزا بولدى, دەيدى تۇركسوي-داعى قازاق­ستاننىڭ وكىلى مالىك وتارباەۆ. «ەگەمەن-اقپارات».