كەشە ماسكەۋدە رەسەيدەگى قازاقستان ەلشىلىگىندە قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتى رەسەي عىلىم اكادەمياسى ەكونوميكا ينستيتۋتىنىڭ قۇرمەت بەلگىسىمەن ماراپاتتاۋ ءراسىمى ءوتتى. ناگرادانى قازاقستان رەسپۋبليكاسىنىڭ پرەزيدەنتىنە تابىستاۋدى وتىنگەن ەكونوميكا ينستيتۋتىنىڭ ديرەكتورى رۋسلان گرينبەرگ بىلاي دەدى:
– مەن ءۇشىن ەۋرازيالىق وداقتىڭ قۇرىلۋىنا نەگىز سالعان ءىزاشار رەتىندە نۇرسۇلتان ءابىش ۇلى نازارباەۆقا ءبىزدىڭ ينستيتۋتتىڭ قۇرمەت بەلگىسىن بەرۋ زور مارتەبە. ءبىز الەمدىك ەكونوميكانىڭ ورتادان تەپكىش كۇشتەرى ورتاعا تارتقىش كۇشىنەن باسىم بولىپ وتىرعان بەيمازا كەزەڭىندە ءومىر ءسۇرىپ وتىرمىز. سونىڭ وزىندە ايماقتاندىرۋ ۇدەرىسى قالىپتاسقانىن اتاپ ءوتۋ قاجەت. رەسەي مەن قىتايدىڭ ورتاسىندا ورنالاسقان قازاقستاندى باسقارۋ ءۇشىن تەك اقىل مەن كاسىبيلىك قانا ەمەس, سونىمەن بىرگە, ەرجۇرەكتىلىك تە قاجەت ەكەندىگىن اتاپ وتكىم كەلەدى. نۇرسۇلتان ءابىش ۇلى ءدال سونداي ەرجۇرەك ادام, كورەگەن ساياساتكەر بولىپ تابىلادى جانە ول قازاقستان رەسپۋبليكاسىن باسقارىپ وتىرعانىنا مەن شىنايى قۋانامىن», – دەدى ينستيتۋت ديرەكتورى.
قۇرمەت بەلگىسىن قابىل العان قازاقستاننىڭ رەسەيدەگى توتەنشە جانە وكىلەتتى ەلشىسى مارات ءتاجين ءوز كەزەگىندە رەسەيلىك اكادەميككە قازاقستان رەسپۋبليكاسى پرەزيدەنتىنىڭ ەرەكشە قىزمەتىن مويىنداعانى ءۇشىن ىستىق ىقىلاسىن ءبىلدىردى.
– نۇرسۇلتان ءابىش ۇلىنىڭ ەكونوميكا عىلىمىنىڭ دامۋىنا قوسقان ۇلەسىنە جوعارى باعا بەرگەنىڭىز ءۇشىن العىسىمدى ايتامىن. جالپى العاندا, قازاقستاننىڭ ەكونوميكالىق دامۋ ۇلگىسى پرەزيدەنتتىڭ ەكونوميكاعا كوزقاراسىنىڭ دامۋىمەن ايقىندالادى. ۇزاق جىلدار بويى ءبىزدىڭ ەلىمىز جوعارى ەكونوميكالىق تيىمدىلىكتى كورسەتىپ وتىرعانى – بۇل نۇرسۇلتان ءابىش ۇلىنىڭ ەرىك-جىگەرىنىڭ ءناتيجەسى», – دەدى مارات ءتاجين.
قازاقستان ەلشىسى رەسەي عىلىم اكادەمياسى ەكونوميكا ينستيتۋتى مەن قازاقستان اراسىندا ۇزاق ۋاقىتتان بەرى تىعىز ءارى جەمىستى بايلانىس ورناعانىن ەسكە سالدى. جانە بۇل قارىم-قاتىناس ودان ءارى جالعاسىن تاباتىنىنا سەنىم ءبىلدىردى.
سالتاناتتى شاراعا قازاقستان ەلشىلىگىنىڭ قىزمەتكەرلەرى جانە بۇقارالىق اقپارات قۇرالدارىنىڭ وكىلدەرى قاتىستى, دەپ حابارلادى قازاقستان رەسپۋبليكاسىنىڭ رەسەي فەدەراتسياسىنداعى ەلشىلىگىنىڭ ءباسپاسوز قىزمەتى.