وسى اپتادا وڭتۇستىك استانادا دا «مەرەيلى وتباسى» جالپىۇلتتىق بايقاۋى قالالىق كەزەڭىنىڭ قورىتىندىسى شىعارىلدى. بايقاۋ بارىسىندا ءۇش وتباسى جەڭىمپاز اتاندى. ولار – ۇوس ارداگەرلەرى كالينيندەردىڭ وتباسى مەن دۋداەۆتاردىڭ مەديتسينالىق اۋلەتى جانە كوپبالالى قادىروۆتار.
ۇلگىلى وتباسىلاردى ماراپاتتاۋ سالتاناتىنا الماتى اكىمى احمەتجان ەسىموۆتىڭ ءوزى كەلىپ, قىزىقتى شاراعا قوعامدىق ۇيىمداردىڭ, وتباسىلاردى الەۋمەتتىك قولداۋ بىرلەستىكتەرى مەن داعدارىستار ورتالىقتارىنىڭ وكىلدەرى قاتىستى.
مەگاپوليس باسشىسى مەملەكەتتىڭ مۇددەسىمەن قولعا الىنعان وسىناۋ بايقاۋدىڭ ءمانى جايلى ءسوز قوزعادى. اكىم ءاربىر جاننىڭ ءوز شاڭىراعىندا ادامگەرشىلىك قاسيەتتەردى ۇستانىپ, نەكە ءومىرشەڭدىگىن ۇلگى ەتۋى, داستۇرلەردى سىيلاۋى – جالپى وتباسىنىڭ مارتەبەسىن ارتتىرۋدا بارىنشا ماڭىزدى ءارى كوكەيكەستى ەكەندىگىن اتاپ ءوتتى.
«وسىناۋ وتباسىلىق فەستيۆالدىڭ ماڭىزى وتە زور. بيىل بىلتىرعى بايقاۋعا قاراعاندا ەكى ەسە كوپ وتباسىلار قاتىستى. جارىسقا قاتىسىپ وتىرعان وتباسىلاردىڭ بارلىعى ءتۇرلى كاسىپتىڭ, ەتنوستىڭ جانە ەڭبەگىمەن ابىرويعا بولەنگەن اۋلەتتىڭ وكىلدەرى», – دەدى احمەتجان ەسىموۆ.
مەملەكەت وتباسىلارعا جان-جاقتى قولداۋ كورسەتۋدە. نارەستە ومىرگە كەلگەن كەزدە ءبىر رەتتىك جاردەم اقشا جانە بالا ءبىر جاسقا تولعانشا الەۋمەتتىك جاردەم كورسەتىلەدى ءارى كوپبالالى انالار دا جاردەم اقشا الادى. «قولجەتىمدى باسپانا-2020» مەملەكەتتىك باعدارلاما اياسىندا الماتىدا 800-دەن استام كوپبالالى جانە جاس وتباسى وزگە دە الەۋمەتتىك جاعىنان قورعالاتىن تۇرعىندارمەن بىرگە پاتەر كىلتتەرىن الدى.
قالا باسشىسى جەڭىمپاز وتباسىلارىنا جۇلدەلەرىن تاپسىرۋ بارىسىندا الماتىداعى وتباسىلىق-دەموگرافيالىق جاعدايدىڭ وڭ ديناميكاسىن اتاپ ءوتتى. مىسالى, سوڭعى 5 جىل ىشىندە مەگاپوليس تۇرعىندارىنىڭ ورتاشا ءومىر ءسۇرۋ جاسى 4 جىلعا ارتىپ, 74,6 جاستى قۇراعان (ەرلەر – 70,2, ايەلدەر – 78,3).
دۇنيە ەسىگىن اشىپ جاتقان ءسابيلەردىڭ ءوسۋ ديناميكاسى دا تۇراقتى. مىسالى, وتكەن جىلى الماتىدا 42 مىڭ نارەستە دۇنيەگە كەلگەن, بۇل – ەلىمىزدىڭ ءاربىر توعىزىنشى بالاسى. انا ءولىمى 6 ەسە, ال ءسابي ءولىمى 2 ەسە تومەندەگەن.
ايناش ەسالي,
«ەگەمەن قازاقستان».
الماتى.