استانادا ەلىمىزدىڭ سىرتقى ىستەر ءمينيسترى ەرلان ىدىرىسوۆ قازاقستانعا رەسمي ساپارمەن كەلگەن كاتاردىڭ سىرتقى ساياسات ۆەدومستۆوسىنىڭ باسشىسى دوكتور حالەد بەن مۇحاممەد ءال-اتىيامەن كەزدەسىپ, كەلىسسوز جۇرگىزدى.
تاراپتار ساياسي ۇنقاتىسۋدى ودان ءارى تەرەڭدەتۋ, ساۋدا-ەكونوميكالىق جانە مادەني-گۋمانيتارلىق ىنتىماقتاستىقتى كۇشەيتۋ ماسەلەلەرىن تالقىلادى.
كاتار ءامىرى شەيح تاميم بەن حاماد ءال تانيدىڭ 2014 جىلى قازاقستانعا ساپارى كەزىندە قول جەتكىزىلگەن ۋاعدالاستىقتارعا, سونداي-اق, قازاقستان-كاتار بىرلەسكەن ينۆەستيتسيالىق قورىن قۇرۋ مەن مەملەكەتتەر اراسىندا تىكەلەي اۋە قاتىناسىن ورناتۋ ماسەلەلەرىنە ەرەكشە كوڭىل ءبولىندى. كاتار ءمينيسترى ساپارىنىڭ ماڭىزدى ماقساتتارىنىڭ ءبىرى قازاقستان پرەزيدەنتى ن.ءا. نازارباەۆتىڭ كاتارعا ۇستىمىزدەگى جىلدىڭ قازان ايىندا جاۋاپ ساپارىنىڭ ساپالى دايارلىعى ەكەنىن اتاپ ءوتتى.
«ءبىز شەيح تاميم بەن حاماد ءال تانيدىڭ ساپارى بارىسىندا جاريالاعان استانا قالاسىندا مەكتەپ سالۋ جوباسىن قارجىلاندىرۋ نيەتى ءۇشىن العىسىمىزدى بىلدىرەمىز. بەرىلگەن جوبا اياسىندا استانا اكىمدىگى مەن كاتار دامۋ قورى اراسىندا ناقتىلى جۇمىستار اتقارىلا باستادى», – دەپ اتاپ ءوتتى ە. ىدىرىسوۆ.
كاتار ءامىرى ساپارىنىڭ قورىتىندىسى بويىنشا, سونىمەن بىرگە, سەمەي قالاسىندا يادرولىق پوليگون سىناقتارىنان زارداپ شەككەندەرگە ارنالعان وڭالتۋ ورتالىعىنىڭ قۇرىلىسىنا كاتار تاراپىنىڭ قاتىسۋى تۋرالى شەشىمگە قول جەتكىزىلدى جانە قازىرگى تاڭدا ن.نازارباەۆتىڭ مادەني, ءبىلىم بەرۋ جانە الەۋمەتتىك باعدارلامالار قورى مەن كاتار دامۋ قورى اراسىندا ءتيىستى قۇجاتتامانى دايارلاۋ ۇدەرىسى جۇزەگە اسۋدا.
كەزدەسۋ كەزىندە, سونىمەن بىرگە, حالىقارالىق وزەكتى ماسەلەلەر, اتاپ ايتقاندا, تاياۋ شىعىس ماسەلەسىن رەتتەۋ, يراك, ليۆيا, سيريا جانە يەمەندەگى احۋالعا, سونداي-اق, ۋكراينا داعدارىسىنا قاتىستى ءوزارا سەنىمدى پىكىر الماسۋ جۇزەگە استى. داعدارىستى شەشۋ جولىندا مۇددەلى تاراپتاردىڭ ۇجىمدىق كۇش-جىگەرىنىڭ قاجەتتىلىگى اتاپ ءوتىلدى.
«قازاقستان مەن كاتار تەك بەيبىتشىلىكسۇيگىش ەمەس, سونىمەن قاتار, بىتىمگەرشى مەملەكەتتەر», – دەپ اتاپ ءوتتى كاتارلىق مينيستر كەلىسسوزدىڭ ناتيجەسى بويىنشا وتكەن ءباسپاسوز ءماسليحاتى بارىسىندا.
تاراپتار بۇۇ, اوسشك, يىۇ سەكىلدى حالىقارالىق جانە وڭىرلىك ۇيىمدار شەڭبەرىندە ەكى ەل ىقپالداسۋىن وڭ باعالادى.
«ەگەمەن-اقپارات».