تالداۋ مەكتەبىنىڭ ءتورتىنشى ماۋسىمى

سەنات سپيكەرى جوباعا قاتىسۋ­شىلارعا ءىلتيپات بىلدىرە كەلىپ, تالداۋ مەكتەبى – جاڭا ءبىلىم مەڭگەرۋگە ارنالعان ورىن عانا ەمەس, سونىمەن قاتار نەتۆوركينگكە, ساراپتامالىق بايلانىس ورناتۋعا, يدەيا­لارمەن الماسۋعا, بىرەگەي جوبا­لاردى بىرلەسىپ ازىرلەۋگە, وزەكتى ماسەلەلەردى شەشۋ جولدارىن تابۋ­عا, ءتۇرلى تالدامالىق, الەۋمەت­تىك جانە وزگە دە جوبالاردى ۇيىم­داستىرۋعا ارنالعان الاڭ ەكەنىن ايتتى.

سونداي-اق پالاتا توراعاسى اتاپ وتكەندەي, بۇل قوعامدىق جوبا مەملەكەتتىك قىزمەتتە, بيزنەستە, حالىقارالىق ۇيىمداردا جانە باسقا دا سالالاردا جۇمىس ىستەيتىن جاس مامانداردىڭ تالدامالىق داعدىلارىن جەتىلدىرۋگە ىقپال ەتەدى.

بيىل وقۋ باعدارلاماسى «Data-driven decision-making» تا­قى­رى­بى­نا ارنالىپ وتىر. قا­تى­سۋ­شى­لاردى وقىتۋ سىني ويلاۋ داع­دىلارى مەن تالداۋ ادىستەرى, اناليتيكا جانە Big Data, ستراتەگيالىق جوسپارلاۋ جانە ستاتيستيكالىق مالىمەتتەرمەن جۇمىس ىستەۋ, Data Governance & AI, انا­لي­تيكالىق ماتەريالداردى دايىن­داۋ قىرلارى جانە حالىق­ارالىق ستاندارتتار, «Data-driven decision-making» جانە ماتىنمەن جۇمىس ىستەۋ سياقتى 7 نەگىزگى مودۋل بويىنشا جۇرگىزىلەدى.

«پرەزيدەنتىمىز قاسىم-جومارت توقاەۆ اناليتيكالىق قارىم-قابىلەتى جوعارى ماماندار­دىڭ جاڭا تولقىنىن دايارلاۋدىڭ ماڭىزدى ەكەنىن بىرنەشە رەت اتاپ ءوتتى. قازىرگى تاڭدا كەز كەلگەن شەشىم كوپتەگەن فاكتوردى ەسكەرۋدى تالاپ ەتەتىنى بەلگىلى. سوندىقتان اناليتيكا مەملەكەتتىك ورگاندار مەن بيزنەس ءۇشىن ستراتەگيالىق تەتىككە اينالىپ وتىر. مۇنداي جاعدايدا اناليتيكالىق قابىلەتتەر مەن زاماناۋي تسيفرلىق مۇمكىندىكتەردىڭ ۇيلەسىم تابۋى ەرەشە مانگە يە. تالداۋ مەكتەبى – وسى ستراتەگيالىق مىندەتتى ىسكە اسىرۋعا قوسىلعان ۇلەس. بيىل دا قاتىسۋشىلاردى ادەتتەگىدەي ءوز سالالارىندا مول تاجىريبەسى بار بەلگىلى وتاندىق جانە شەتەلدىك ساراپشىلار وقىتادى», دەدى م.اشىمباەۆ.

ايتا كەتەيىك, ءتورتىنشى كەزەڭگە قاتىسۋعا 700-گە جۋىق ءوتىنىم كەلىپ ءتۇستى. بايقاۋ كوميسسياسىنىڭ وتىنىمدەردى قاراۋ ناتيجەسىندە جوباعا قاتىسۋعا 60 ادام مۇمكىندىك الدى. ولار – اناليتيكالىق قۇرى­لىمداردا, مەملەكەتتىك باسقارۋ جۇيەسىندە, ۇلتتىق كومپانيالار مەن عىلىمي-زەرتتەۋ ينستيتۋتتارىندا, باسقا دا ءتۇرلى سالالاردا تاجىريبەسى بار جانە PhD عىلىمي دارەجەسىنە يە ماماندار.

م.اشىمباەۆ ءوز دارىسىندە تال­داما­لىق جۇمىستىڭ تۇجىرىم­دامالىق قىرلارىنا نازار اۋدار­دى. تالقىلاۋ بارىسىندا مەم­لەكەتتىك باسقارۋ ىسىندە تسيفرلىق قۇرالداردى قولدانۋعا جانە شەشىمدەر قابىلداۋعا قاتىستى كەيستەر تالدانىپ, ترەندتەر ساراپتالدى.

«تالداۋ مەكتەبىنىڭ يدەولوگياسى سىني ويلاۋعا, جاڭا شەشىمدەر تابۋعا جانە ەلىمىزدىڭ قۋاتتى ءارى يننوۆاتسيالىق دامۋىنا ىقپال ەتەتىن بەيستاندارت ستراتەگيالاردى قۇرۋعا قابىلەتتى مامانداردىڭ جاڭا بۋىنىن قالىپتاستىرۋدى كوزدەيدى», دەپ سەنات توراعاسى قارىم-قابىلەتتى ارتتىرۋ جولىن­داعى جەكە تاجىريبەسىمەن ءبولىستى.

تالداۋ مەكتەبىندەگى دارىستەر­دىڭ ءبىر ەرەكشەلىگى – توپپەن جۇمىس ىستەۋ داعدىلارىن دامىتۋ. بۇل soft skill-ءدى جەتىلدىرۋ ءۇشىن قاتى­سۋشىلارعا ارنايى شاقىرىل­عان تالىم­گەرلەر – ناقتى سالا بو­يىن­شا سا­راپ­شىلار, ەرىكتى نەگىزدە قاتىساتىن مەملەكەتتىك قۇرى­لىم­­داردىڭ, عىلىمي جانە حالىق­ارا­لىق ۇيىمداردىڭ وكىل­دەرى قول­داۋ كورسەتەدى. سونداي-اق قاتىسۋ­شى­لار ءبىلىم بەرۋ ينكليۋ­زيا­سى, گەن­دەرلىك دامۋ, بالامالى ەنەر­گەتي­­كا, ەڭبەك كوشى-قونى سياقتى جە­تى باعىت بويىنشا بىرلەسكەن جو­­با­­لار دا­يىنداۋ ءۇشىن توپتارعا ءبولىندى.

ءتورتىنشى كەزەڭنىڭ العاشقى كۇنىندە Sinovation Venture جاساندى ينتەللەكت ينستيتۋتىنىڭ پرەزيدەنتى, دوكتور كاي-فۋ لي ءدارىس جۇرگىزدى. ال ستراتەگيالىق جانە داعدارىستىق كوممۋنيكاتسيا­لار جونىندەگى ساراپشى ەربول يسمايلوۆ كوماندالىق ءبىلىم بەرۋ, تىڭ تاسىلدەردى تەرەڭ مەڭگەرۋ جونىندە فاسيليتاتسيالىق سەسسيا وتكىزدى.

الداعى سەگىز اپتادا Nazarbayev University پرەزيدەنتى, پروفەسسور ۆاكار احماد, «پيشي, سوكراششاي» كىتابىنىڭ اۆتورى ماكسيم يلياحوۆ, قازاقستان ستراتەگيالىق زەرتتەۋلەر ينستيتۋتىنىڭ ديرەكتورى ەركىن تۇقىموۆتىڭ دارىستەرى جوسپارلانعان. سپيكەرلەردىڭ قاتارىندا مەملەكەتتىك ورگاندار مەن حالىقارالىق عىلىمي-زەرتتەۋ ۇيىمدارىنىڭ وكىلدەرى دە بار. ناقتى ايتقاندا, قازاقستان پرەزيدەنتىنىڭ كەڭەسشىسى قۋانىشبەك ەسەكەەۆ, ۇلتتىق بانك توراعاسى تيمۋر سۇلەيمەنوۆ, تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ, ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى جاندوس شايماردانوۆ, «وتباسى بانكتىڭ» باسقارما توراعاسى ءلاززات يبراگيموۆا ءدارىس وقيدى.

تاعى ءبىر ايتا كەتەر جايت, ساباق­تار بيىلعى 1 ناۋرىزعا دەيىن ءار سەنبى سايىن وتەدى. كەزەڭ قورى­تىندىسى بويىنشا قاتى­سۋ­شىلاردىڭ تالداۋ ماتەريال­دارىنىڭ جيناعى شىعارىلادى. ول پارلامەنت دەپۋتاتتارىنا جانە سالالىق مەملەكەتتىك ورگاندارعا ۇسىنىم رەتىندە جىبەرىلەدى.

ساراپشىلاردىڭ بەينە دارىستەرى تالداۋ مەكتەبىنىڭ رەسمي YouTube ارناسىنا جاريالانىپ وتىرادى – https://www.youtube.com/@SchoolofAnalytics. سون­داي-اق اتالعان YouTube ارنادا مەكتەپتىڭ الدىڭعى ءۇش كەزەڭىندەگى دارىستەر دە قولجەتىمدى.