بۇگىن يتاليانىڭ تۋرين قالاسىندا ستۋدەنتتەردىڭ دۇنيەجۇزىلىك قىسقى ۋنيۆەرسياداسى باستالدى. وسكەمەننىڭ وجەت قىزى اياۋلىم امىرەنوۆا ۋنيۆەرسيادا ويىندارىندا ەلىمىزدىڭ كوك تۋىن شايبالى حوككەي شەبەرى ابىلايحان سۇلەيمەنوۆپەن بىرگە ۇستاپ شىعادى.
اياۋلىمنىڭ اكەسى سەرىك امىرەنوۆ پەن اناسى گاۋحاريا كەڭەسبەكقىزى – زايسان اۋدانىنىڭ تۋماسى. كەڭەسبەكتىڭ تۋعان اعاسى, جازۋشى كەڭەسحان زاكەنوۆ – قازاق ءباسپاسوزىنىڭ قارا شاڭىراعى «ەgemen Qazaqstan» گازەتىنىڭ ارداگەرى. اتا-اناسى اياۋلىمدى ءتورت جاسىنان فريستايلدىڭ موگۋل تۇرىنە بەرەدى. بۇل – وتە كۇردەلى سپورت. بيىك تاۋدان تومەن قاراي زىمىراپ, كەدەرگىلەردەن سەكىرۋ وڭاي شارۋا ەمەس. الايدا قايسار قىز بارىنە شىدادى. بىردە اكەسى, بىردە اناسى وسكەمەن قالاسىنان 15 شاقىرىم جەردەگى جاتتىعۋ الاڭىنا ەرىنبەي-جالىقپاي اپارىپ ءجۇردى.
«اياۋلىم ءسابي كەزىنەن وجەت, العىر بولدى. بي, سپورتتى ەرەكشە ۇناتاتىن. «فلەش» دەگەن بي توبىنا قاتىستى. ءتورت جاسىنان فريستايل سەكتسياسىنا جازىلدى. دومبىرا شەرتەدى, مۋزىكاعا قۇمار, اعىلشىن ءتىلىن ەركىن مەڭگەرىپ الدى. فريستايل – قازاق قىزدارىنا توسىن سپورت ءتۇرى. العاشقى باپكەرى سەرگەي اكسەنوۆكە مىڭ العىس, ودان كەيىنگى ۇستازى ۆ.سوكولوۆ, ەلىمىزدىڭ جاستار قۇراماسىنىڭ اعا جاتتىقتىرۋشىسى ۆيكتور رەيحەرد تە اياۋلىمنان ءۇمىت كۇتتى, ءاردايىم جەڭىسكە جىگەرلەندىرىپ وتىردى. اياۋلىمنىڭ جەتىستىكتەرى – وسى ۇستازدارىنىڭ ەڭبەگى», دەيدى اكەسى.
2013 جىلى ەۋروپا چەمپيوناتىندا اياۋلىم ءۇش بىردەي جۇلدە – التىن, كۇمىس, قولا مەدال جەڭىپ الدى. بۇدان كەيىن دە ءتۇرلى ءدۇبىرلى جارىستا ەل نامىسىن ابىرويمەن قورعادى. 2018 جىلى كورەيانىڭ پحەنچحان قالاسىندا جالاۋى جەلبىرەگەن قىسقى وليمپيادا ويىندارىندا جۇلدەگە ىلىنە الماسا دا, جارىستان شىعىپ قالعان جوق, العاشقى جيىرمالىققا ءىلىندى. ءتورت جىلدان كەيىن بەيجىڭدەگى اق وليمپياداعا دا قاتىسىپ, شەبەرلىگىن شىڭداي ءتۇستى. ەكى وليمپيا ويىندارىندا, الەم كۋبوگى, بىرنەشە حالىقارالىق جارىستا جاقسى ونەر كورسەتكەن اياۋلىمنان اتا-اناسى, قازاق جۇرتى جەڭىس قانا كۇتەدى.
«اياۋلىم مەكتەپتى, قازاق ۇلتتىق سپورت اكادەمياسىنىڭ ماگيستراتۋراسىن ۇزدىك ءبىتىردى. سودان سوڭ ءال-فارابي اتىنداعى مەملەكەتتىك ۋنيۆەرسيتەتتىڭ دوكتورانتۋراسىنا ءتۇستى. سپورت پەن وقۋدى بىرگە الىپ كەلە جاتقان قىزىما ريزامىز. تۋرين تورىندەگى جارىستا جەڭىسكە جەتەدى دەگەن ۇمىتتەمىز», دەيدى س.امىرەنوۆ.
وڭداسىن ەلۋباي,
«ەgemen Qazaqstan» گازەتىنىڭ ارداگەرى