پارلامەنت ءماجىلىسىنىڭ الەۋمەتتىك-مادەني دامۋ كوميتەتىنىڭ ءتورايىمى گۇلنار ىقسانوۆا باستاعان ءبىر توپ دەپۋتات اۋعانستان يسلام رەسپۋبليكاسى پارلامەنتى تومەنگى پالاتاسىنىڭ (ۆولەسي دجيرگا) دەلەگاتسياسىن قابىلدادى, دەپ حابارلادى ءماجىلىستىڭ ءباسپاسوز قىزمەتى.
دەلەگاتسيا جەتەكشىسى اۋعانستان پارلامەنتىنىڭ ايەلدەر مەن بالالار ىستەرى جونىندەگى كوميسسيا توراعاسىنىڭ ورىنباسارى شۋكريا پايكان احمادي بولدى.
كەزدەسۋدە نەگىزگى اڭگىمە ءماجىلىس ۇيىمداستىرعان قازاقستان حالقى اسسامبلەياسىنىڭ 20 جىلدىعىنا ارنالعان حالىقارالىق كونفەرەنتسياعا ارنالدى. جۇزدەسۋدە قازاقستانداعى ۇلتارالىق كەلىسىم تاجىريبەسىنە كوپۇلتتى اۋعانستان تاراپى قىزىعۋشىلىق تانىتتى.
سونىمەن بىرگە, گ.ىقسانوۆا ءماجىلىس وتكىزگەن كونفەرەنتسيا وعان قاتىسۋشىلار ءۇشىن بارلىق جاعىنان پايدالى بولعانىن ايتتى. جانە دە قازاقستان پرەزيدەنتى ن.ءا.نازارباەۆ پەن ءبىزدىڭ حالىق بەيبىتشىلىكتى جانە سوعان ۇمتىلعان بارلىق ەلدەردى قولدايتىنىن, سونىڭ ىشىندە اۋعانستان دا بار ەكەنىن اتاپ ءوتتى. سول ماقساتقا جەتۋ ءۇشىن ەكى ەل اراسىنداعى جان-جاقتى ىنتىماقتاستىق, اسىرەسە, مادەني-ىزگىلىكتى باعىتتى قامتيتىنىن مالىمدەدى.
شۋكريا پايكان احمادي كونفەرەنتسياعا شاقىرىلعانى ءۇشىن العىسىن ايتىپ, اۋعانستانعا جاسالىپ جاتقان بارلىق كومەككە, اسىرەسە, قايىرىمدىلىق كومەگىنە ريزاشىلىق ءبىلدىردى. «ءبىزدىڭ ەلىمىزدە بولعان سوعىستاردا, سونىڭ ىشىندە تاليبتەرمەن سوعىستا ايەلدەر قاتتى زارداپ شەكتى. اۋعانستان ءوز دوستارىنىڭ كومەگىنە ءزارۋ», – دەپ ءمالىمدەدى اۋعانستان پارلامەنتشىسى. سوندىقتان مۇنداي جيىندار, پارلامەنتتىك ديپلوماتيانى جانداندىرادى, حالىقتاردىڭ ىنتىماقتاستىعىن ارتتىرىپ, بەيبىتشىلىك پەن ءوسىپ-وركەندەۋگە نەگىز قالايدى.
پارلامەنتارالىق ماسەلەلەردى كەڭ اۋقىمدا قاراستىرعان جۇزدەسۋگە ءماجىلىس دەپۋتاتتارى ۋ.بيشىمباەۆ پەن م.قازبەكوۆا جانە اۋعانستان يسلام رەسپۋبليكاسى پارلامەنتى ۆولەسي دجيرگاسىنىڭ بيۋدجەت بويىنشا كوميسسيا مۇشەسى باز موحامماد دجاۋزدجاني, اۋعانستان يسلام رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى موحامماد فارۋك باراكي قاتىستى.