پارلامەنت سەناتى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى يكرام ادىربەكوۆ اۋعانستان پارلامەنتى تومەنگى پالاتاسىنىڭ (ۆولەسي دجيرگا) قۇندىز پروۆينتسياسىنىڭ دەپۋتاتى شۋكريا پايكان احماديمەن جانە دجاۋزدجان پروۆينتسياسىنىڭ دەپۋتاتى باز موحامماد دجاۋزدجانيمەن ولاردىڭ ءوتىنىشى بويىنشا كەزدەستى.
كەزدەسۋ بارىسىندا ەكىجاقتى قاتىناستاردى نىعايتۋ, سونداي-اق, پارلامەنتارالىق وداق پەن يسلام ىنتىماقتاستىعى ۇيىمى پارلامەنتتىك وداعى اياسىنداعى كوپجاقتى بايلانىستاردى دامىتۋ ماسەلەلەرى تالقىلاندى. اۋعانستانمەن قاتىناستاردىڭ قارقىندى دامي تۇسۋىنە جانە پارلامەنتارالىق بايلانىستاردى ۇدەتۋگە ورتاق ۇمتىلىسقا قاناعاتتانعاندىق بىلدىرە وتىرىپ, ي.ادىربەكوۆ اۋعانستان قازاقستاننىڭ ازياداعى ماڭىزدى ارىپتەستەرىنىڭ ءبىرى ەكەنىن اتاپ ءوتتى.
اۋعانستاندىق پارلامەنتشىلەر اوسشك, شىۇ, ىستامبۇل ۇدەرىسى, ورتالىق ازياداعى ايماقتىق ەكونوميكالىق ىنتىماقتاستىق سەكىلدى بەدەلدى الاڭدارى بار ايماقتىق ىقپالداستىقتىڭ ءتيىمدى سيپاتىندا قازاقستاننىڭ بەلسەندى ءرول اتقاراتىنىن ايتتى. تاراپتار قازىرگى كەزدەسۋلەردىڭ ناتيجەلەرى ەكىجاقتى ىنتىماقتاستىقتى جاڭا مازمۇنعا بايىتا وتىرىپ, جاڭا مىندەتتەر مەن باعىتتاردى ايقىنداۋعا مۇمكىندىك بەرەتىنىنە سەنىم ءبىلدىردى, دەپ حابارلادى پارلامەنت سەناتىنىڭ ءباسپاسوز قىزمەتى.