ورال. 4 اقپان. ورالدا سوتتار قىزمەتىنىڭ وتكەن جىلعى قورىتىندىلارىنا ارنالعان بريفينگ وتكىزىلدى. بۇل تۋرالى egemen.kz حابارلادى.
جيىندا باتىس قازاقستان وبلىستىق سوتىنىڭ توراعاسى بەك امەتوۆ وتكەن جىلى وڭىردەگى سوتتاردىڭ اتىنا 107 ارىز-شاعىم كەلىپ تۇسكەنىن مالىمدەدى. بۇل شاعىمدار نەگىزىنەن سوت ۇدەرىسى بارىسىنداعى سۋديالاردىڭ ءىس-ارەكەتىنە قاتىستى تۋىنداعان. وبلىستىق سوت توراعاسىنىڭ ايتۋىنشا, تۇرعىندار نەگىزىنەن بىرقاتار سوت شەشىمدەرىمەن كەلىسپەيتىنى تۋرالى ءۇن قاتقان.
«وتكەن جىلى اسقار ايتۋعانوۆ, باقىتجان ساتىبالديەۆ, داستان بايمەنوۆ جانە سەرىك حۋساينوۆ سەكىلدى ءتورت سۋديا قىزمەتتەرىنەن بوساتىلدى», – دەدى بەك امەتوۆ.
توراعانىڭ تۇسىندىرۋىنشە, باتىس قازاقستان وبلىستىق مامانداندىرىلعان اۋدانارالىق قىلمىستىق سوتىنىڭ سۋدياسى اسقار ايتۋعانوۆ سۋديا مارتەبەسىنە سايكەسپەيتىن قىلىقتارعا جول بەرگەنى ءۇشىن اتقارىپ جۇرگەن قىزمەتىنەن بوساتىلعان. ال ورال قالالىق سوتىنىڭ سۋدياسى داستان بايمەنوۆ پەن اۋداندىق سوتتىڭ سۋدياسى سەرىك حۋساينوۆتار ەڭبەك ءتارتىبىن بۇزعاندارى ءۇشىن قىزمەتتەرىمەن قوشتاسقان.
سونداي-اق بىلتىرعى 14 قازاندا سۋديا يبراگيم نيازعاليەۆ توراعالىق ەتكەن ورال قالالىق سوتى زەلەنوۆ اۋداندىق سوتىنىڭ بۇرىڭعى توراعاسى باقىتجان ساتىبالديەۆتى ءوزىنىڭ جۇمىس كابينەتىندە «عينيات» قۇرىلىس جشس-نىڭ ديرەكتورىنان 200 مىڭ تەڭگە كولەمىندە پارا العانى ءۇشىن كىنالى دەپ تاۋىپ, ونى التى جىلعا باس بوستاندىعىنان ايىرۋ جونىندە ۇكىم شىعاردى.
تەمىر قۇسايىن.
دەرەك: egemen.kz.
سۋرەت: uralskweek.kz.