«ەكسپەرت» كلۋبىنىڭ «سامۇرىق-قازىنا» اق ترانسفورماتسياسى: پروبلەمالار جانە ولاردى ىسكە اسىرۋ جولدارى» تاقىرىبىندا وتىرىس ءوتتى. اتالعان كلۋبتىڭ كەزدەسۋىنە «ەير استانا» كومپانياسىنىڭ ۆيتسە-پرەزيدەنتى ەربول وسپانوۆ, «قازپوشتا» اق باسقارما توراعاسى باعدات مۋسين, «قازاقتەلەكوم» اق باسقارما توراعاسى قۋانىشبەك ەسەكەەۆ پەن جيىنعا مودەراتور بولعان كلۋب جەتەكشىسى نۇرلان ەرىمبەتوۆ قاتىستى.
ەلباسى بەكىتكەن, قازىرگى كەزدە «سامۇرىق-قازىنا» اق قولداۋىمەن ونىڭ بارلىق ەنشىلەس كومپانيالارىندا ترانسفورماتسيالاۋ باعدارلاماسى جۇزەگە اسىرىلۋدا. اتالعان باعدارلاما بىلتىردان بەرى قولعا الىنىپ, وسىنىڭ اياسىندا ەنشىلەس كومپانيالار ءوز قىزمەتتەرىن باستاپ تا كەتكەن بولاتىن. بارشاعا بەلگىلى بولعانداي, اتالمىش باعدارلاما ءۇش نەگىزگى ماقساتتى كوزدەيدى, ولار قولدانىستاعى اكتيۆتەردىڭ قۇنىن ارتتىرۋ, پورتفەلدى وڭتايلاندىرۋ جانە كورپوراتيۆتىك باسقارۋدى جەتىلدىرۋ بولىپ تابىلادى.
وسىعان بايلانىستى ءوز تاراپىنان قولعا الىنىپ جاتقان ءىس-شارالار جونىندە باق وكىلدەرىنە بىرقاتار مالىمەتتەر ۇسىنعان كومپانيا باسشىلارى, ترانسفورماتسيا باعدارلاماسىنىڭ بولاشاق يگىلىگى ءۇشىن جاسالىنىپ وتىرعان باستاما ەكەندىگىنە نازار اۋداردى. بيزنەستى ترانسفورماتسيالاۋ دەگەن نە, ول باعدارلاما نە ءۇشىن قاجەت, قوردىڭ ەنشىلەس كومپانيالارىندا ترانسفورماتسيالاۋ باعدارلاماسىن ەنگىزۋ ءۇشىن قانداي العىشارتتار بولدى, دەگەن سۇراقتارعا جاۋاپ بەرىلدى. كوپ جاعدايدا حالىقتىڭ تۇسىنبەۋشىلىگىن تۋدىرىپ, ءتىپتى, «ورلەۋ» ساتىسىن «قىسقارتۋمەن» ۇقساستىراتىن ءدۇيىم جۇرتتىڭ ويىنا تىڭ سەرپىلىس بەرەتىن ۋاقىت كەلىپ جەتكەن سەكىلدى, سونىمەن قاتار, بولاشاققا قادام باسقان مەملەكەتتىڭ تۇرعىندارى قىزمەت بابىندا تەك قانا دامۋ, ورلەۋ, العا ۇمتىلۋ مەن ءوز دەڭگەيىن جەتىلدىرۋ ءۇشىن ايانباي تەر توگۋ قاجەتتىگى تالقىلاندى.
بۇل تۇرعىدا جۋرناليست سۇراقتارىنا ناقتى جاۋاپ بەرگەن ب.مۋسين بەلگىلى رەتتە جۇمىسكەرلەردىڭ قىزمەت بويىنشا ءوسۋدى كوزدەۋى مەن قاجەتتى ماماندىقتاردىڭ سۇرانىسىن ارتتىرۋ كەرەكتىگىن ايتتى. قىزمەتكەرلەردى قىسقارتۋ ەمەس, ولاردىڭ جاساپ وتىرعان جۇمىس دەڭگەيىن انىقتاپ, ونىڭ قاجەتتىلىگىنە بايلانىستى ماسەلەنى ايقىنداپ الۋ شارت. ءبىر مەكەمەدە ءۇش بۋحگالتەردىڭ جۇمىس ىستەۋى ەڭبەك ونىمدىلىگىن ارتتىرماۋى مۇمكىن, كەرىسىنشە, ولار جاساپ وتىرعان جۇمىس رەتىن انىقتاپ, تۋرا سول جۇمىستى بەلگىلى تەحنيكانىڭ كومەگىمەن جاساتىپ, ال بوس قالعان بۋحگالتەرگە وپەراتور بولۋدى ۇسىنعاندىعىن ايتتى. جانە ول ەلباسى ۇدايى ايتىپ كەلەتىن قىزمەتكەرلەردىڭ بىلىكتىلىگى مەن ولاردىڭ تاراپتان كورسەتىلىپ جاتقان قىزمەت ەلگە ءوز ۇلەسىن تيگىزۋى قاجەت ەكەندىگىنە توقتالدى.
شىن مانىندە وتە جوعارى ءناتيجەگە جەتۋ ءۇشىن حالىق تاراپىنان وسى ماسەلەگە بايلانىستى كوزقاراستى وزگەرتۋ ابزال. جۇمىس كەزىندە مامان بىلىكتىلىگىن ارتتىرۋ – جۇرت يگىلىگى ءۇشىن جاسالاتىن وڭتايلى ءادىس. ولار سونىڭ ارقاسىندا سۇرانىسقا يە, وزىنە سەنىمدى ءارى قاجەتتى مامان بولىپ شىعا الادى. ال ءبىر ورىندا ءومىر بويى جۇمىس ىستەپ, سول كەزەڭدە قالىپ قوياتىن ماماندارى بار ەلدە ورلەۋ ساتىسى باياۋلاپ قالاتىنى تاعى بار. شەتەلدە ازاماتتار جۇمىس ورنىن اۋىستىرۋعا قۇمار, سەبەبى, ولار ءبىر ورىندا توقىراپ قالۋدان ساقتانادى. ولار وسى پسيحولوگيانى جاقسى مەڭگەرگەن. سەبەبى, جاقسىلىققا ۇمتىلۋ – ارقاشاندا وڭ ناتيجە بەرگەن, بەرە بەرەدى دە, دەگەن نۇرلان ەرىمبەتوۆ مامانداردىڭ بىلىكتىلىگىن ارتتىرۋ بارىنەن ماڭىزدى ەكەندىگىن جەتكىزدى.
ەلميرا ماتىباەۆا,
«ەگەمەن قازاقستان».