ەندى قازاقستاندا تۇسىرىلەتىن فيلمدەردى قارجىلاندىرۋدىڭ جالپى كولەمىنىڭ كەمىندە 30%-ى تىكەلەي «قازاقفيلمگە» باعىتتالادى. بۇل تۋرالى مادەنيەت جانە اقپارات ءمينيسترى ايدا بالاەۆا مالىمدەدى, دەپ حابارلايدى Egemen.kz.
مەملەكەت باسشىسى قاسىم-جومارت توقاەۆ مادەنيەت جانە اقپارات مينيسترلىگىنىڭ قىزمەتىنە قاتىستى, سونداي-اق باسقا دا بىرقاتار ماڭىزدى جاڭاشىلدىقتى قامتيتىن زاڭعا قول قويعان ەدى. وسى تۇستا سالا ءمينيسترى ايدا بالاەۆا ۆەدومستۆو جۇمىسىنا قاتىستى مالىمدەمە جاسادى.
ءمينيستردىڭ ايتۋىنشا, شاكەن ايمانوۆ اتىنداعى «قازاقفيلم» كينوستۋدياسى ءوزىنىڭ جاڭا دامۋ كەزەڭىنە قادام باسقالى تۇر.
«ەندى ەلىمىزدە تۇسىرىلەتىن فيلمدەردى قارجىلاندىرۋدىڭ جالپى كولەمىنىڭ كەمىندە 30%-ى تىكەلەي «قازاقفيلمگە» باعىتتالادى. بۇل كينوستۋديانىڭ جۇمىسى ءتيىمدى ءارى قارجىلىق تۇرعىدان تۇراقتى بولۋىنا مۇمكىندىك بەرەدى.
وكىنىشكە قاراي, كينوستۋديادا بولىپ جاتقان وڭ وزگەرىستەرگە كوڭىلى تولمايتىن كينوگەرلەر دە جوق ەمەس. ارينە, اشىقتىق پەن جاريالىققا, كىرۋ رەجيمىن قاتاڭداتۋعا, كينوستۋديا قىزمەتىنىڭ تيىمدىلىگىن تەكسەرۋگە باعىتتالعان قارجىلىق رەفورمالار بارلىعىنا بىردەي ۇناي بەرمەيدى», دەدى ايدا بالاەۆا.
بۇل رەتتە مينيستر كينوستۋديا – مەملەكەتتىك نىسان ەكەنىن ەسكە سالىپ, ونىڭ ارنايى ەرەجەلەرى بولۋى زاڭدى ەكەنىن جەتكىزدى. بۇعان ستۋديا اۋماعىندا قىمبات قۇرال-جابدىقتار مەن مادەني مۇرا وبەكتىلەرى ورنالاسقانى دا سەبەپ بولىپ وتىر.
«قارجىلىق ماسەلەگە كەلەر بولساق, ءتيىمدى مەنەدجمەنت قۇرال-جابدىقتار مەن ءۇي-جايلاردى جالعا بەرۋ كينوستۋديانىڭ مۇددەسىنە ساي جۇزەگە اسپاعانىن كورسەتتى. كوپتەگەن جەكە كومپانيالار «قازاقفيلمدە» كوممەرتسيالىق فيلمدەر تۇسىرگەنىمەن, ونداعى تابىس كينوستۋديا بيۋدجەتىنە تۇسپەگەن.
كوممەرتسيالىق اۋماقتارعا اۋديت جۇرگىزۋ كەزىندە دە جالعا الۋ قۇنىن بەكىتۋدە تاڭدامالى تاسىلدەر بولعانى انىقتالدى. ماسەلەن, ەكى كەلىسىمشارت بويىنشا جالعا الۋ باعاسى ادەيى تومەندەتىلگەن, سونىڭ سالدارىنان ءبىر جاعدايدا 11 اي ىشىندە 5 940 ميلليون تەڭگە, ال ەكىنشىسىندە 7 اي ىشىندە 42 ميلليون تەڭگە شىعىن كەلگەن», دەپ ءتۇسىندىردى ۆەدومستۆو باسشىسى.
ونىڭ ايتۋىنشا, قۇرال-جابدىقتار مەن ءۇي-جايلاردى جالعا بەرۋدە قاتاڭ رەجيم مەن باقىلاۋ ورناتۋ, جاڭا قارجىلاندىرۋ جۇيەسىمەن دۇرىس باسقارۋ ارقىلى ستۋديانى ءوزىن-ءوزى قامتاماسىز ەتەتىن تابىستى ورتالىققا اينالدىرۋعا بولادى.
«ماسەلەن, وتكەن جىلى ستۋديا ءتورت كوممەرتسيالىق ءفيلمدى ەكرانعا شىعاردى, ونىڭ ىشىندە «شىرماۋىق» (رەجيسسەر ا.شارعىن) جانە «كاپيتان بايتاسوۆ» (رەجيسسەر د.قامشىباەۆ) كوركەم فيلمدەرى, سونداي-اق ەكى دەرەكتى فيلم بار.
سونىمەن قاتار «التىن ادام» اتتى انيماتسيالىق فيلم تولىعىمەن «قازاقفيلمنىڭ» تەحنيكالىق بازاسىندا جاسالىپ, ونى 2025 جىلدىڭ ناۋرىز ايىندا كوپشىلىك نازارىنا ۇسىنۋ جوسپارلانىپ وتىر», دەپ قوستى ايدا بالاەۆا.
ايتا كەتەيىك, قازىرگى كەزدە «جابايى» جانە «مالاي» اتتى كوركەم فيلمدەر ءتۇسىرىلىپ جاتىر, ودان بولەك «كۇلپاش», «بۇركىتشى» جوبالارى جۇزەگە اسىرىلادى. سونداي-اق بيىل ءوز قاراجاتى ەسەبىنەن «مۋزا» اتتى دەرەكتى فيلم ءتۇسىرۋ جوسپارلانىپ وتىر.
«مەملەكەت باسشىسىنىڭ «قازاقفيلم» كينوستۋدياسى جۇمىسىن جەتىلدىرۋ بويىنشا قويىپ وتىرعان مىندەتتەردى ورىنداۋدا بۇگىنگى قابىلدانعان زاڭ شەشۋشى ءرول اتقارادى دەپ سەنەمىن.
بۇعان دەيىن دە اتاپ وتكەنىمدەي, «قازاقفيلم» تەك جۇمىسىن جالعاستىرىپ قانا قويماي, قارقىندى تۇردە دامي بەرەدى», دەپ ءسوزىن اياقتادى مينيستر.