استانا قالاسى وتباسى ينستيتۋتىن قولداۋ ورتالىعىندا سالانىڭ قىزمەتىن جەتىلدىرۋگە, پوليمودالدى كەڭەسشىلەردى دايارلاۋعا باعىتتالعان پراكتيكالىق سەمينار-ترەنينگ ءوتتى. كەلەلى كەڭەسكە مادەنيەت جانە اقپارات, ەڭبەك جانە حالىقتى الەۋمەتتىك قورعاۋ مينيسترلىكتەرىنىڭ وكىلدەرى, وتباسىن قولداۋ ورتالىقتارىنىڭ قىزمەتكەرلەرى قاتىستى.
ءىس-شارا بارىسىندا مادەنيەت جانە اقپارات مينيسترلىگىنىڭ وتباسىن قولداۋ ورتالىقتارى جۇمىسىن جەتىلدىرۋگە باعىتتالعان جوبالىق كەڭسەنىڭ جەتەكشىسى فاريدا ساعىندىق باسقوسۋدىڭ ءمان-ماڭىزىنا توقتالىپ, ماقساتىن ءمالىم ەتتى.
«قازىر ەلىمىزدە 65 وتباسىن قولداۋ ورتالىعى جۇمىس ىستەيدى. ولاردىڭ نەگىزگى مىندەتتەرى – مەملەكەتتىك وتباسى ساياساتىن جۇرگىزۋ, ومىردە قيىن جاعدايعا تاپ بولعان ادامداردى قولداۋ, تۇرمىستىق زورلىق-زومبىلىقتىڭ الدىن الۋ, كومەك كورسەتۋ, ءموبيلدى توپتاردىڭ جۇمىسىن ۇيىمداستىرۋ. بۇگىنگى ءىس-شارا دا وتباسىن قولداۋ ورتالىقتارىنىڭ جۇمىسىن جەتىلدىرۋگە ارنالىپ وتىر. داعدارىس ورتالىقتارىنىڭ جۇمىسىن جەتىلدىرۋ, ۆەدومستۆوارالىق ءوزارا ءىس-قيمىلدى جولعا قويۋ, جۇمىستىڭ بىرىڭعاي ءادىسناماسىن قۇرۋ, ونى جۇزەگە اسىرۋ بارىسىندا ولقىلىقتار بولسا, ورنى وسىنداي سەمينارلاردا تولىعادى. سونداي-اق حالىققا كەڭىنەن اقپارات بەرىلەدى», دەدى فاريدا ساعىندىق.
پىكىرسايىسقا قاتىسقان سپيكەرلەر ءتۇرلى تاقىرىپتا بايانداما جاسادى, ورتالىقتاردىڭ جۇمىسىن جۇرگىزۋدە مەملەكەت تاراپىنان ارنايى قارجىلاي قولداۋ ارتىپ كەلە جاتقانىنا توقتالىپ, قيىن ومىرلىك جاعدايدا قالعان ادامداردى قولداۋ, ولارعا كومەك كورسەتۋ قاشاندا وزەكتى ەكەنىن جەتكىزدى.
2024 جىلدىڭ ءساۋىر ايىندا «ايەلدەردىڭ قۇقىقتارىن قورعاۋ جانە بالالاردىڭ قاۋىپسىزدىگىن قامتاماسىز ەتۋ تۋرالى» زاڭنىڭ قابىلدانۋى وتباسى ينستيتۋتىن نىعايتۋ مەن تۇرمىستىق زورلىق-زومبىلىقتىڭ الدىن الۋدا ماڭىزدى قادام بولدى. زاڭنىڭ جاڭا رەداكتسياسى وقو قىزمەتىنە دە وزگەرىستەر ەنگىزدى – وتباسىن قولداۋ ورتالىقتارىنىڭ بىرىڭعاي جەلىسى قۇرىلىپ, وتباسى ماسەلەلەرىن شەشۋدە كەيس-مەنەدجمەنت ەنگىزىلدى. مامانداردىڭ ايتۋىنشا, ورتالىقتار كومەككە جۇگىنگەندەردىڭ جاعدايىن كەشەندى تۇردە باعالاپ, ءار وتباسىنىڭ جاعدايىنا بايلانىستى جەكە جوسپار ازىرلەپ, ونى جۇيەلى جۇزەگە اسىرىپ كەلە جاتىر.
قازىر قيىن جاعدايدا قالعان وتباسىلاردى ەرتە انىقتاۋ ماقساتىندا مادەنيەت جانە اقپارات, ەڭبەك جانە حالىقتى الەۋمەتتىك قورعاۋ, ىشكى ىستەر, دەنساۋلىق ساقتاۋ مينيسترلىكتەرىنىڭ ماماندارىنان موبيلدىك جۇمىس توپتارى قۇرىلعان. سونىمەن قاتار مەملەكەتتىك ورگانداردىڭ ۆەدومستۆوارالىق ءوزارا ءىس-قيمىلىنىڭ جەدەلدىگى مەن ىڭعايلىلىعى ءۇشىن الەۋمەتتىك قىزمەتتەردى ۇسىنۋدىڭ ينتەگراتسيالانعان مودەلى رەتىندە ءموبيلدى قوسىمشا ازىرلەنىپ, سىناقتان ءوتىپ جاتىر. استانا قالاسى اكىمدىگىنىڭ «جانۇيا» وتباسى ينستيتۋتىن قولداۋ ورتالىعىنىڭ ديرەكتورى باقتيار ايتباەۆتىڭ ايتۋىنشا, وندا ەلورداداعى وتباسىلارعا قۇقىقتىق, پسيحولوگيالىق, الەۋمەتتىك كومەك كورسەتىلەدى.
«الەۋمەتتىك ساياسات – قوعامنىڭ ءومىر ءسۇرۋ جاعدايىن رەتتەۋدىڭ ءبىر باعىتى, وسى ورايدا, قالا اكىمدىگى تاراپىنان الەۋمەتتىك توپتار اراسىنداعى قارىم-قاتىناستاردى قولداپ, جالپى قوعام مۇشەلەرىنىڭ ءال-قۋاتى مەن ءومىر ءسۇرۋ دەڭگەيىن جاقسارتۋ نەگىزىندە 2019 جىلعى 26 تامىزدا قالا اكىمدىگىنىڭ جانىنان «جانۇيا» وتباسىن قولداۋ ورتالىعى قاناتقاقتى جوبا تۇرىندە اشىلدى. جوبانىڭ ماقساتى – قيىن جاعدايعا تاپ بولعان ءاربىر وتباسىعا پسيحولوگيالىق, الەۋمەتتىك, قۇقىقتىق كومەك, سونىمەن قاتار وتباسى ينستيتۋتىنىڭ دامۋىنا جان-جاقتى قولداۋ كورسەتۋ. ورتالىق قاناتقاقتى جوبا رەجىمىندە ءوز جۇمىسىنىڭ جوعارى سۇرانىسقا يە ەكەنىن دالەلدەپ, 2020 جىلعى مامىر ايىنان باستاپ مەملەكەتتىك مەكەمە بولىپ رەسمي تۇردە جۇمىس ىستەي باستادى. ورتالىق ء«بىر تەرەزە» قاعيداتىنا نەگىزدەلىپ, قالا تۇرعىندارىنىڭ (كوپبالالى, تولىق ەمەس, از قامتىلعان, مۇگەدەك بالالاردى تاربيەلەپ وتىرعان, وتباسىلارعا, ت.س.س.), ازاماتتاردىڭ جەكەلەنگەن ساناتتارىنا كەشەندى كونسۋلتاتسيالىق قىزمەتتەر كورسەتەدى», دەيدى ول.
جاڭا زاڭ قولدانىسقا ەنگەن ساتتەن باستاپ قولداۋ ورتالىقتاردىڭ سانى وسكەن. 2025–2027 جىلدارى ولاردىڭ سانىن 208-گە جەتكىزۋ جوسپارلانىپ وتىرعانىن ايتادى ماماندار. وتكەن جىلى ورتالىق ماماندارى 400 مىڭنان استام كەڭەس بەرگەن. ورتالىق قىزمەتكەرلەرىنىڭ بىلىكتىلىگىن ارتتىرۋ, سونداي-اق موبيلدىك توپتاردىڭ ءتيىمدى جۇمىسىن قامتاماسىز ەتۋ ماقساتىندا بارلىق وڭىردە كوشپەلى وقىتۋ سەمينار-ترەنينگتەرى وتكىزىلىپ تۇرادى.