بىلتىر بالالار ادەبيەتىنىڭ كلاسسيگى بەردىبەك سوقپاقباەۆتىڭ 100 جىلدىعى يۋنەسكو كولەمىندە اتالىپ وتكەنى بەلگىلى. قوناەۆ قالاسىندا ۇلى تۇلعانىڭ ەسىمى ءالى دە ۇلىقتالىپ جاتىر. جاڭا جىلدا ورتالىق ساياباققا جازۋشى ب.سوقپاقباەۆتىڭ ەسىمى بەرىلدى.
بۇل ساياباق ەكى جىل بۇرىن كۇردەلى جوندەۋدەن ءوتىپ, قولدانىسقا بەرىلگەن ەدى. جالپى اۋماعى 8 گەكتار جەردى الىپ جاتقان ساياباقتا سۋبۇرقاقتار, ساحنا, كورەرمەن ورنى, دۇڭگىرشەكتەر, ءتۇرلى شاعىن ساۋلەتتىك نىساندار قويىلىپ, زاماناۋي ستيلدەگى جابدىقتارمەن جابدىقتالعان. ونىڭ قاتارىندا ورىندىقتار, جارىق شامدارى, قوقىس جاشىكتەرى بار. سونداي-اق كۇردەلى جوندەۋدەن وتكەندە پارك اۋماعىنا 584 ءتۇپ اعاش ەگىلگەن. قالا تۇرعىندارى مەن قوناقتارعا قولايلى ساياباققا سپورت الاڭى مەن فۋتبول الاڭى دا سالىنعان.
وتكەن جىلدىڭ سوڭىندا ورتالىق ساياباقتا ب.سوقپاقباەۆ پەن ونىڭ تانىمال تۋىندىسى «مەنىڭ اتىم قوجانىڭ» شاعىن ساۋلەتتىك نىسانى اشىلسا, 11 قاڭتار كۇنى مۇز ايدىنى قولدانىسقا بەرىلمەك. سونىمەن قاتار قالاداعى تسەنترالنايا كوشەسى قازاق ادەبيەتىنىڭ كلاسسيگى ب.سوقپاقباەۆتىڭ ەسىمىمەن اتالعانىن ايرىقشا اتاعىمىز كەلەدى.
الماتى وبلىسى