ەلباسى نۇرسۇلتان نازارباەۆ كاتار مەملەكەتىنىڭ سىرتقى ىستەر ءمينيسترى حالەد ءال-اتىيانى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
كەزدەسۋ بارىسىندا ساۋدا-ەكونوميكا, ينۆەستيتسيا جانە كولىك-ترانزيت سالالارىنداعى ىنتىماقتاستىق ماسەلەلەرى تالقىلاندى.
نۇرسۇلتان نازارباەۆ قازاقستان مەن كاتاردىڭ قارىم-قاتىناسى جوعارى دەڭگەيدە ەكەنىن اتاپ ءوتتى.
– ءسىزدىڭ ساپارىڭىز ىنتىماقتاستىعىمىزدىڭ دەڭگەيىن ودان ءارى كوتەرۋگە سەپتىگىن تيگىزەتىنىنە سەنىمدىمىن. كاتار ءبىزدىڭ ەلوردامىزدىڭ قۇرىلىسىنا, سونىڭ ىشىندە «نۇر استانا» مەشىتىنىڭ قۇرىلىسىنا جاردەم ەتتى. سونىمەن قاتار, سەمەي پوليگونىنداعى يادرولىق سىناقتاردان زارداپ شەككەن جاندار ءۇشىن سەمەي قالاسىندا سالۋ جوسپارلانعان ساۋىقتىرۋ ورتالىعىنىڭ قۇرىلىسىنا جاسالعان كومەككە ريزاشىلىق بىلدىرگىم كەلەدى, – دەدى مەملەكەت باسشىسى.
بۇل جوبا ن.نازارباەۆتىڭ ءمادەنيەت, ءبىلىم جانە الەۋمەتتىك باعدارلامالار قورى مەن كاتار دامۋ قورىنىڭ ءوزارا ىقپالداستىعى نەگىزىندە جۇزەگە اسىرىلۋدا.
حالەد ءال-اتىيا ءوز كەزەگىندە كاتار ءامىرىنىڭ سالەمىن جەتكىزىپ, ەكىجاقتى ىنتىماقتاستىق ودان ءارى نىعايا بەرەدى دەپ ۇمىتتەنەتىنىن ءبىلدىردى.
سۋرەتتى تۇسىرگەندەر
س.بوندارەنكو, ب.وتارباەۆ.