وقۋ-اعارتۋ مينيسترلىگىنىڭ رەسپۋبليكالىق عىلىمي-پراكتيكالىق ءبىلىم مازمۇنىن ساراپتاۋ ورتالىعى 2025-2026 وقۋ جىلىندا قولدانىلاتىن وقۋلىقتار مەن وقۋ-ادىستەمەلىك كەشەندەردى ساراپتامادان وتكىزدى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
ساراپتامادا 278 وقۋلىق پەن وقۋ-ادىستەمەلىك قۇرال قارالعان. ونىڭ 266-سى ماقۇلدانىپ, پايدالانۋعا ۇسىنىلعان.
ايتا كەتەيىك, ەرەكشە ءبىلىم بەرۋ قاجەتتىلىكتەرى بار بالالارعا ارنالعان برايل شريفتىمەن جانە جازۋى ۇلكەيتىلگەن وقۋلىقتار دا ازىرلەنگەن. 4-سىنىپتار ءۇشىن تسيفرلىق ساۋاتتىلىق, ورىس ءتىلى جانە شەت تىلدەرى (اعىلشىن, نەمىس, فرانتسۋز), بەينەلەۋ ونەرى, ەڭبەككە باۋلۋ, جاراتىلىستانۋ پاندەرى بويىنشا وقۋلىقتار جانە ۇيعىر, وزبەك تىلدەرىندە وقىتاتىن مەكتەپتەرگە ارنالعان وقۋ قۇرالدارى بەكىتىلگەن.
«پاندىك ساراپتاما كوميسسياسىندا تاجىريبەلى پەداگوگتەر مەن عالىمدار جۇمىس ىستەدى. وقۋ ادەبيەتتەرىن باعالاۋ ءار باسىلىمدى سىناقتان وتكىزۋ مەن تالداۋ ناتيجەلەرىنە نەگىزدەلىپ, عىلىمي-پەداگوگيكالىق تالاپتارعا سايكەس جۇرگىزىلدى. بەكىتىلگەن وقۋلىقتار مەن وقۋ-ادىستەمەلىك كەشەندەر ءبىلىم بەرۋدىڭ زاماناۋي تالاپتارىنا تولىق سايكەس كەلىپ, وقۋشىلاردىڭ تابىستى وقۋىنا جانە بولاشاقتا قاجەتتى ماڭىزدى داعدىلار مەن بىلىمدەردى دامىتۋعا باعىتتالعان», دەدى مينيسترلىكتىڭ رەسپۋبليكالىق عىلىمي-پراكتيكالىق ءبىلىم مازمۇنىن ساراپتاۋ ورتالىعىنىڭ ديرەكتورى نازيرا ءابدىراحمانوۆا.
سونىمەن قاتار مەكتەپكە دەيىنگى ءبىلىم بەرۋ ۇيىمدارىنا ارنالعان وقۋ-ادىستەمەلىك قۇرالدار العاش رەت كەشەندى ساراپتامادان ءوتتى. وقۋ-ادىستەمەلىك كەشەنگە ادىستەمەلىك نۇسقاۋلىق, جۇمىس داپتەرى, وقۋلىق, ۇلەستىرمە جانە دەمونستراتسيالىق ماتەريالدار مەن البومدار كىرەدى.