الماتىعا جۇمىس ساپارى بارىسىندا قازاقستان رەسپۋبليكاسىنىڭ توتەنشە جاعدايلار ءمينيسترى گەنەرال-مايور شىڭعىس ءارىنوۆ «قازسەلدەنقورعاۋ» مەملەكەتتىك مەكەمەسىنىڭ الماتى فيليالىنا بارىپ, فيليالدىڭ قىزمەتىمەن تانىستى. سونداي-اق بىرقاتار وبەكتىلەردى, سونىڭ ىشىندە ورتالىق ديسپەتچەرلىك پۋنكت پەن اۆتوموبيل جانە ارنايى تەحنيكانىڭ جاي-كۇيىن تەكسەردى, دەپ حابارلايدى Egemen.kz.
ساپار بارىسىندا ۆەدومستۆو باسشىسى «قازسەلدەنقورعاۋ» قىزمەتكەرلەرىمەن بىرلەسىپ كوشكىن جاعدايىنا مونيتورينگ جۇرگىزۋ جانە باعالاۋ ءۇشىن اەروۆيزۋالدى بارلاۋ جۇرگىزدى. قار كوشكىنىنىڭ الدىن الۋ ءۇشىن ورناتىلعان جاڭا جابدىققا ەرەكشە نازار اۋدارىلدى.
شىڭعىس ارىنوۆكە «DaisyBell» ءموبيلدى قار كوشكىنىنە قارسى جۇيەسى تانىستىرىلىپ, سىناقتان ءوتتى. بۇل قوندىرعى تىكۇشاققا كابەل ارقىلى بەكىتىلگەن مەتالل كونۋس بولىپ تابىلادى. قۇرىلعىنىڭ جۇمىس ءپرينتسيپى كونۋستاعى ازوت-سۋتەگى قوسپاسىنىڭ بۇزىلۋىن قاشىقتان باستاۋ بولىپ تابىلادى, بۇل قار كوشكىنىنىڭ ءتيىمدى تۇسۋىنە ىقپال ەتىپ, اسا اۋىر سالداردىڭ الدىن الۋعا مۇمكىندىك بەرەدى. «DaisyBell» قار كوشكىنىنە قارسى جۇيەسى ەۋروپا ەلدەرىندە, سونىڭ ىشىندە رەسەيدە ءساتتى قولدانىلىپ كەلەدى جانە جەرگىلىكتى كليماتتىق جاعدايلاردا ونىڭ جۇمىسىن باعالاۋ ءۇشىن قازاقستاندا سىناقتان ءوتىپ جاتىر.
«قازاۆياقۇتقارۋ» اق تىكۇشاعىمەن اەروۆيزۋالدى بارلاۋ شەڭبەرىندە جۇيە ۇلكەن جانە كىشى الماتى وزەندەرى باسسەيندەرىنىڭ كوشكىن قاۋپى بار ۋچاسكەلەرىندە قار كوشكىندەرىنىڭ پروفيلاكتيكالىق تۇسۋىمەن سىناقتان ءوتتى. مينيستر كوشكىن قاۋپى كەزەڭىندە پروفيلاكتيكالىق جۇمىستاردا جاڭا تەحنولوگيالاردى قولدانۋ قاجەتتىگىن اتاپ ءوتىپ, ءتيىستى تاپسىرمالار بەردى.
قار كوشكىنى - ادامداردىڭ ومىرىنە قاۋىپ توندىرەتىن قازاقستانداعى اسا قاۋىپتى تابيعي قۇبىلىستاردىڭ ءبىرى. قار كوشكىنى قاۋپى بار كەزەڭ قاراشادان مامىرعا دەيىن سوزىلادى, ال بيىك تاۋلى ايماقتاردا قار كوشكىنى جىل بويى ءجۇرۋى مۇمكىن. ەلىمىزدە كوشكىن قاۋپى بار 619 ۋچاسكە بار, ونىڭ 165-ءى الماتى قالاسىندا ورنالاسقان. سوڭعى جىلدارى قىسقى دەمالىس تۇرلەرىنىڭ تانىمالدىلىعىنىڭ ارتۋىمەن ادامداردىڭ ومىرىنە قاۋىپ ايتارلىقتاي ءوستى.
قار كوشكىنىنىڭ الدىن الۋ ءۇشىن «قازسەلدەنقورعاۋ» جىل سايىن 150-گە دەيىن پروفيلاكتيكالىق ءتۇسىرۋ جۇرگىزەدى, قاردىڭ كولەمى 250 مىڭ تەكشە مەترگە جەتۋى مۇمكىن. 2024-2025 جىلدارداعى قىسقى ماۋسىمدا جالپى كولەمى شامامەن 6665 م3 قار بولاتىن 15 پروفيلاكتيكالىق ءتۇسىرۋ جۇرگىزىلدى.
«قازگيدرومەت» رمك بولجامى بويىنشا 2025 جىلدىڭ قاڭتار جانە اقپان ايلارىندا تاۋلى اۋماقتىڭ باسىم بولىگىندە جوعارى تەمپەراتۋرا مەن مول جاۋىن-شاشىن كۇتىلەدى, بۇل قار جامىلعىسىنىڭ تۇراقسىز جاعدايىنا الىپ كەلەدى جانە كوشكىن قاۋپى بار وقيعالاردىڭ ىقتيمالدىعىن ارتتىرادى.