سەنات دەپۋتاتتارى دارحان قىدىرالى مەن الىشەر ساتۆالديەۆ «مەملەكەتتىك تەحنيكالىق قىزمەت» اق ۇجىمىمەن كەزدەستى. وندا تسيفرلاندىرۋدىڭ بولاشاعى, جاساندى ينتەللەكتى قولدانۋدىڭ ارتىقشىلىعى مەن نەيروجەلىلەردىڭ دامۋى تۋىنداتاتىن قاۋىپتەر تۋرالى پىكىرلەر ورتاعا سالىندى. مەملەكەت باسشىسى وسى ماسەلەلەردى «انا ءتىلى» گازەتىنە بەرگەن سۇحباتىندا اتاپ وتكەن ەدى, دەپ حابارلايدى Egemen.kz.
پارلامەنتشىلەر اقپاراتتىق قاۋىپسىزدىك جونىندەگى ۇلتتىق ۇيلەستىرۋ ورتالىعى مەن تەلەكوممۋنيكاتسيا جەلىلەرىن باسقارۋ ورتالىعىنىڭ جانە كومپيۋتەرلىك ينتسيدەنتتەرگە ارەكەت ەتۋ ۇلتتىق قىزمەتى مەن زياندى كودتى زەرتتەۋ ورتالىعىنىڭ جۇمىس بارىسىمەن جانە ناتيجەلەرىمەن تانىستى.
«تسيفرلىق تەحنولوگيا ەلىمىزدە كەڭىنەن تارالىپ جاتىر جانە كۇندەلىكتى ومىرىمىزگە ەنە باستادى. الايدا, جەتىستىكتەرمەن قاتار كيبەركەڭىستىكتەگى قاۋىپ-قاتەر دە كوبەيىپ كەلەدى. وسىعان بايلانىستى تەحنيكالىق ينفراقۇرىلىمدى جەتىلدىرۋ, زاڭنامانى بەيىمدەۋ, ءبىلىم بەرۋ باعدارلاماسىن دامىتۋ, جاساندى ينتەللەكتى جاۋاپكەرشىلىكپەن ەنگىزۋ سياقتى كەشەندى شارالاردى قابىلداۋ قاجەت. مەملەكەت باسشىسى بۇل ماسەلەگە ەرەكشە نازار اۋدارىپ وتىر», دەپ اتاپ ءوتتى دارحان قىدىرالى.
دەپۋتاتتار سەناتتىڭ زاڭ شىعارۋ قىزمەتى تۋرالى حاباردار ەتتى. سونداي-اق ۇيىم قىزمەتكەرلەرىمەن كيبەرگيگيەنانى دامىتۋ, كيبەرقاۋىپسىزدىكتى ارتتىرۋ ءۇشىن زاڭنامالىق نەگىزدەردى قالىپتاستىرۋ ماسەلەسىن دە ەگجەي-تەگجەيلى تالقىلادى.