پرەزيدەنت «انا ءتىلى» گازەتىنە بەرگەن سۇحباتىندا جاستاردىڭ بولاشاعىن ويلاپ, شىن جۇرەكتەن تىلەۋلەستىك بىلدىرەتىنىن, ەلىمىزدىڭ تاعدىرى – جاستاردىڭ قولىندا ەكەنىن ايتتى, دەپ حابارلايدى Egemen.kz.
مەملەكەت باسشىسى وتانشىلدىعىن ناقتى ىسىمەن كورسەتەتىن ءارى مادەنيەتى جوعارى ۇرپاق ءوسىرۋ - ادەمى ءسوز ەمەس, مەملەكەت ستراتەگياسىنىڭ تۇپكى ءمانى ەكەنىن ايتتى.
«بۇگىنگى جاستار ءبىزدىڭ جاس كەزىمىزگە قاراعاندا الدەقايدا كوپ بىلەدى. قازىرگى تەحنولوگيا داۋىرىندە بۇل – قالىپتى نارسە. قازاقستاندا دارىندى, ءبىلىمدى ءارى ماقساتىنا ۇمتىلا بىلەتىن قىز-جىگىتتەر كوپ. ءدال سول سەبەپتى مەن جاستارعا سەنەمىن دەپ جالىقپاي ايتا بەرەمىن.
ءبىر عانا تىلەگىم, اقىل-كەڭەسىم بار: جاس ازاماتتارىمىز دۇنيەتانىمى تۇرعىسىنان جاسامپاز, ويلاۋ قابىلەتى جاعىنان سىندارلى بولۋعا ءتيىس, ولار جاقسى مەن جاماننىڭ اراجىگىن اجىراتا ءبىلۋى كەرەك. جاستارىمىز حالقىمىزدىڭ بولمىسىنا جات يدەيالاردىڭ جەتەگىندە كەتپەسە, كۇيزەلىسكە تۇسپەسە, نيگيليزمگە بوي الدىرماسا ەكەن دەپ تىلەيمىن. ولاردىڭ بەلسەندى, ءتارتىپتى, ءبىلىمپاز, ەڭبەكقور بولعانىن قالايمىن.
تاۋەلسىزدىك ۇرپاقتارى قازىردىڭ وزىندە عىلىم, سپورت, بيزنەس, كرەاتيۆتى يندۋستريا جانە مەملەكەتتىك قىزمەت سالاسىندا زور جەتىستىككە جەتىپ ءجۇر. كوبى وندىرىستە جانە اۋىل شارۋاشىلىعىندا تابىستى ەڭبەك ەتەدى. بۇل رەتتە مەن وسى جىلدى «جۇمىسشى ماماندىقتار جىلى» دەپ جاريالادىم. ءبىز ەڭبەك ادامىنىڭ ابىروي-بەدەلىن كوتەرىپ, ەڭبەكقورلىق, كاسىبيلىك سياقتى قۇندىلىقتاردى دارىپتەۋ ءۇشىن ءالى تالاي شارۋا اتقارۋىمىز كەرەك», دەدى پرەزيدەنت.
پرەزيدەنت سونىمەن قاتار ەكونوميكانىڭ كوپتەگەن سالاسىندا جۇمىس قولى جەتىسپەي جاتقانىنا توقتالدى.
«جۇمىسشى ماماندىقتار مول ءارى تەز تابىس تابۋ تۇرعىسىنان قىزىقتىرا قويماۋى مۇمكىن. بىراق بۇل ماماندىقتاردىڭ ەڭبەك نارىعىندا سۇرانىسقا يە بولاتىنىنا دا, قوعامداعى مارتەبەسى جوعارى بولاتىنىنا دا كەپىلدىك بار. مەن كاسىپورىنداردى ارالاعان كەزدە جاستاردى ءجيى جولىقتىرامىن. ولاردىڭ اراسىندا جۇمىسشى اۋلەتتەرىنىڭ وكىلدەرى كوپ ەكەنى كوڭىل قۋانتادى. مەملەكەتتىڭ مىندەتى – جاس ماماندارعا ماتەريالدىق جانە مورالدىق جاعىنان كومەكتەسۋ. مەن بۇل شارۋامەن ۇنەمى اينالىسامىن», دەدى مەملەكەت باسشىسى.