رەسەي ۋكراينا اۋماعىنا گاز ايداۋدى توقتاتتى

كومپانيا 2025 جىلعى 1 قاڭتاردان باستاپ 2019 جىلعى 30 جەلتوقساندا «گازپروم» مەن «ۋكراينانىڭ نافتوگازى» اراسىنداعى كورشى ەلدىڭ اۋماعى ارقىلى رەسەي گازىن تاسىمالداۋدى ۇيىمداستىرۋعا قول قويىلعان كەلىسىمنىڭ جانە ەكى ەلدىڭ گتس وپەراتورلارى - «گازپروم» مەن «ۋكراينانىڭ گاز تاسىمالداۋ جۇيەسىنىڭ وپەراتورى» اراسىنداعى ءوزارا ءىس-قيمىل تۋرالى كەلىسىمنىڭ قولدانىلۋ مەرزىمى اياقتالعانىن ناقتىلادى.

«ماسكەۋ ۋاقىتىنا سايكەس تاڭعى ساعات 8:00-دەن باستاپ رەسەيلىك گازدى ۋكراينا اۋماعى ارقىلى تاسىمالداۋ ءۇشىن جەتكىزۋ جۇزەگە اسىرىلمايدى. ۋكراينا تاراپىنىڭ وسى كەلىسىمدى ۇزارتۋدان بىرنەشە رەت جانە ايقىن باس تارتۋىنا بايلانىستى «گازپروم» ۋكراينا اۋماعى ارقىلى ترانزيت ءۇشىن گاز بەرۋدىڭ تەحنيكالىق جانە زاڭدى مۇمكىندىگىنەن ايىرىلدى», دەلىنگەن حابارلامادا.

«Eadaily» اقپاراتتىق اگەنتتىگىنىڭ مالىمەتتەرىنە سۇيەنسەك, 2024 جىلى گازپروم وسى باعىتى بويىنشا شامامەن 15 ميلليارد تەكشە مەتر جانارماي جەتكىزدى, بۇل ەو-داعى جالپى تۇتىنۋدىڭ 4,5 پايىزىن قۇرادى.

ەندى ەۋروپا ەلدەرى ءۇشىن رەسەيلىك قۇبىر گازىنىڭ جالعىز كوزى «تۇرىك اعىنىنان» وتىن الاتىن «بالقان اعىنى» بولىپ قالا بەرەدى. ول جىل سايىن رۋمىنياعا, گرەكياعا, سولتۇستىك ماكەدونياعا, سەربياعا, بوسنيا جانە گەرتسەگوۆيناعا, ۆەنگرياعا شامامەن 14-15 ميلليارد تەكشە مەتر جەتكىزەدى.