ءبىر كەزدە ءبىرشاما باسەڭسىپ قالعان قازاق كوشى بۇگىندە قايتا جاندانىپ كەلەدى. بيىل 18 مىڭنان استام قانداسىمىز تاريحي وتانىنا ورالدى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمدەۋىنشە, جىل باسىنان ەلگە كەلگەن اعايىنداردىڭ 45,4%-ى – قىتايدان, 38,9%-ى – وزبەكستاننان, 6%-ى – موڭعوليادان, 5,8%-ى – تۇرىكمەنستاننان, 2,7%-ى – رەسەيدەن, 1,3%-ى باسقا ەلدەردەن كەلگەن. 1 جەلتوقسانداعى جاعدايعا سايكەس ەڭبەككە قابىلەتتى جاستاعى شەتتەن قونىس اۋدارۋشىلار سانى 57,1%, ەڭبەككە قابىلەتتى جاستان كىشىلەر 33,4%, زەينەتكەرلەر 9,5% بولدى. ءارتۇرلى وڭىرگە قونىستانعان ەڭبەككە قابىلەتتى جاستاعى قونىس اۋدارۋشىلاردىڭ ءبىلىم دارەجەسى: ءبىلىم دەڭگەيى جوعارى – 17,5%, ورتا كاسىبي ءبىلىمدى – 25%, جالپى ورتا ءبىلىمدى – 54,7%, 2,8%-نىڭ ءبىلىمى جوق.
كوشىپ كەلگەن اعايىنداردى ەڭبەك كۇشى تاپشى سانالاتىن اقمولا, اباي, قوستاناي, پاۆلودار, شقو, سقو اۋماعىنا قونىستاندىرۋ ءتيىمدى جۇرگىزىلىپ جاتىر. 2024 جىلعا ارنالعان قونىستاندىرۋ كۆوتاسى 3 033 ادامعا بەلگىلەنگەن. رەسمي دەرەككە سۇيەنسەك, 1 جەلتوقسانعا دەيىن قونىستاندىرۋ كۆوتاسى 2 961 ادامعا اۋدارىلدى. جوعارىدا اتالعان وڭىرلەردە قونىستانعان قانداستارعا سۋبسيديا تۇرىندە بەرىلەتىن مەملەكەتتىك قولداۋ ءىس-شارالارى دا بار. ايتالىق, ءبىر مەزگىلدە وتاعاسىنا, وتباسىنىڭ ءاربىر مۇشەسىنە 70 اەك (258,4 مىڭ تەڭگە) مولشەرىندە; تۇرعىن ءۇي جالداۋعا, كوممۋنالدىق قىزمەتتەرگە اقى تولەۋگە – ءبىر جىل ىشىندە 15-تەن 30 اەك (55,3-دەن 110,7 مىڭ تەڭگەگە دەيىن) مولشەرىندە سۋبسيديا بەرىلەدى.
جىل باسىنان بەرى 2 624 قونىستانۋشىعا ءتۇرلى قولداۋ كورسەتىلدى. اتاپ ايتقاندا, 794 ادام تۇراقتى جۇمىسقا ورنالاستىرىلعان. سونىمەن قاتار ەرىكتى قونىس اۋدارۋدىڭ تيىمدىلىگىن ارتتىرۋ ماقساتىندا ازاماتتاردى ەڭبەك كۇشى تاپشى وڭىرلەرگە قونىس اۋدارۋعا قاتىساتىن جۇمىس بەرۋشىلەردى قولداۋ جونىندە ينستيتۋتسيونالدىق شارالار قابىلداندى. ءۇي ساتىپ الۋ, ءۇي سالۋعا نەمەسە يپوتەكالىق تۇرعىن ءۇي قارىزدارىنىڭ باستاپقى جارنانىڭ ءبىر بولىگىن جابۋعا ەكونوميكالىق ۇتقىرلىق سەرتيفيكاتى بەرىلەدى. تۇرعىن ءۇي قۇنىنىڭ 50%-ى نەمەسە ءبىر وتباسىنا 4,28 ملن تەڭگەگە دەيىن مولشەرىندە بىرجولعى وتەۋسىز, قايتارىمسىز نەگىزدە ەنگىزىلدى. وسىعان دەيىن 2 449 ادام ۇتقىرلىق سەرتيفيكاتىن الدى.
وتكەن جىلى قازاقستان ەلشىلىكتەرى ارقىلى ء«بىر تەرەزە» قاعيداتىمەن «قانداس» مارتەبەسىن بەرۋ تەتىگى ىسكە اسىرىلدى. قاناتقاقتى جوبا اياسىندا ەل اۋماعىنا كىرمەي-اق «قانداس» مارتەبەسىن الۋعا بولادى. بۇگىندە بۇل جاڭا فورماتتا 22 مىڭنان استاپ ءوتىنىش كەلىپ تۇسكەن ەكەن. دەمەك جات جەردەگى قانداستارىمىزدىڭ وتانعا ورالۋعا دەگەن ىقىلاسى ءالى دە جوعارى.