پەتروپاۆل. 1 مامىر. قىزىلجار اۋدانىنىڭ تۋماسى, كەڭەستەر وداعىنىڭ باتىرى فيليپپ چيجيكوۆكە تۋعان جەرى - بەرەزوۆكادا وبەليسك قويىلدى. بۇل تۋرالى egemen ءتىلشىسى حابارلادى.
ف. چيجيكوۆ سوعىسقا 1942 جىلى 19 جاسىندا اتتاناعان. ارنايى اسكەري دايىندىقتان ءوتىپ, 25-ءشى ديۆيزياعا قاراستى 81-ءشى اتقىشتار پولكى قۇرامىندا بولىمشە كومانديرى بولىپ تاعايىندالعان. كىشى لەيتەنانتتار كۋرسىن بىتىرگەننەن كەيىن اتقىشتار ۆزۆودىن باسقارعان. بەلگورود, حاركوۆ, زۆەنيگورود, بۋداپەشت, ۆەنا قالالارىن جاۋدان ازات ەتۋگە قاتىسقان. قاندى شايقاستاردىڭ بىرىندە اۋىر جارالانعانىنا قاراماستان كورسەتكەن قاحارماندىق ەرلىكتەرى ءۇشىن و 1944 كەڭەس وداعىنىڭ باتىرى اتاعى بەرىلىپ, «التىن جۇللىز» بەلگىسى مەن لەنين وردەنى تاپسىرىلعان.
مايداننان ورالعان سوڭ قىزىلجار ءوڭىرىنىڭ ىشكى ىستەر ورگاندارىندا ۇزاق جىل ءمىنسىز ەڭبەك ەتكەن. الماتى ميليتسيا مەكتەبىن ءتامامداپ, جاۋاپتى جۇمىستار اتقارعان. پودپولكوۆنيك شەنىنە دەيىن كوتەرىلگەن. قىزمەت بابىمەن رەسەيگە اۋىسىپ, ءومىرىنىڭ سوڭعى كۇندەرىن ۆورونەج وبلىسىندا وتكىزگەن.
سالتاناتتى جيىندا وبلىس اكىمىنىڭ ءبىرىنشى ورىنباسارى ايداربەك ساپاروۆ, ىشكى ىستەر مينيسترلىگى ارداگەرلەر كەڭەسىنىڭ توراعاسى, گەنەرال- مايور ومىرزاق بولسامبەكوۆ, كادرلار جۇمىستارى بويىنشا دەپارتامەنتتىڭ باسشىسى, پولكوۆنيك التىنعالي ابدىعاليەۆ, تۇمەن وبلىسىنان كەلگەن ىشكى ىستەر قىزمەتىنىڭ ارداگەرى ۆلاديمير بورەتسكي, تاعى باسقالارى سويلەپ, وبەليسكىگە گۇل شوقتارىن قويدى. مارقۇمنىڭ ۆورونەج قالاسىندا تۇراتىن قىزى نادەجدا لەسنىح جەڭىستىڭ 70 جىلدىعى قارساڭىندا ۇيىمداستىرىلعان ايتۋلى شاراعا دەگەن ريزاشىلىعىن, اكەسىنىڭ كوزى جۇمىلاردا قابىرىمنەن تۋعان جەرىمە ءبىر ۋىس توپىراق اپار دەگەن اماناتىن ورىنداعانىن تولقىپ جەتكىزدى.
مەيماندار مەكتەپ جانىنداعى الاڭقايدا جەڭىس اللەياسىنىڭ ىرگەتاسىن قالاپ, كوشەتتەر وتىرعىزدى.
بۇگىندە وبلىستا مەكتەپ, كوشە باتىردىڭ ەسىمىمەن اتالادى.
ءومىر ەسقالي.
دەرەك, سۋرەت: سولتۇستىك قازاقستان ءوىىد-ءنىڭ ءباسپاسوز قىزمەتى.