استانادا تۋريزم جانە سپورت مينيسترلىگىنىڭ ۇيىمداستىرۋىمەن سپورت سالاسىنداعى جىل ۇزدىكتەرى ماراپاتتالدى. سالتاناتتى جيىنعا پارلامەنت دەپۋتاتتارى, وليمپيادا جەڭىمپازدارى مەن جۇلدەگەرلەرى, الەم بىرىنشىلىكتەرى مەن حالىقارالىق جارىستاردىڭ جەڭىمپازدارى, سپورت جۋرناليستەرى قاتىستى.
جيىندا تۋريزم جانە سپورت ءمينيسترى ەربول مىرزابوسىنوۆ 2024 جىل وتاندىق سپورت ءۇشىن ەرەكشە جىل بولعانىن جەتكىزدى. قازاق سپورتشىلارى بيىل حالىقارالىق ءىرى دودالاردا تابىستى ناتيجە كورسەتسە, ەلىمىزدە ءىرى جارىستار ۇيىمداستىرىلدى. ونىڭ ءبىرى V دۇنيەجۇزىلىك كوشپەلىلەر ويىنى. ءدۇبىرلى دوداعا الەمنىڭ 89 ەلىنەن سپورتشىلار قاتىستى. قازاقستان قۇراماسى جالپىكوماندالىق ەسەپتە توپ جاردى.
سونىمەن جىل قورىتىندىسى بويىنشا «ۇزدىك» دەپ تانىلعاندار: ەلدوس سمەتوۆ, داۆيد دەگتيارەۆ – «جىلدىڭ ۇزدىك سپورتشىسى»; عالىمجان جىلگەلديەۆ, يۋري كولەسنيكوۆ – «جىلدىڭ ۇزدىك جاتتىقتىرۋشىسى»; اقمارال ناۋاتبەك – «سپورتتا ۇزدىك سەرپىن» سىيلىعىمەن ماراپاتتالسا, ال ارىپتەسىمىز قۋانىش نۇردانبەك ۇلى «جىلدىڭ ۇزدىك سپورت ءجۋرناليسى» رەتىندە سەيداحمەت بەردىقۇلوۆ اتىنداعى سىيلىقتىڭ لاۋرەاتى اتاندى. سونىمەن قاتار وسى اتالىمدا جاندوس ايتباي ۇلى («حابار» تەلەارناسى), نازەركە سۇلتانبەك («Sport+» سايتى) ماراپاتتالدى.