26 جەلتوقسان كۇنى ۇشاق اپاتىنان زارداپ شەككەن ازەربايجاندىق 14 ازامات پەن كۇنى كەشە اقتاۋعا كەلگەن ازەربايجان دەلەگاتسياسىنىڭ 20 مۇشەسى ءوز ەلدەرىنە اتتاندى. ونىڭ ىشىندە اپاتتان امان قالعان 2 بورتسەرىك پەن 1 بالا بار. ولار اۋرۋحانادا قاجەتتى ەم الىپ, جاعدايلارى تۇراقتالعان سوڭ باكۋگە اتتاندى, دەپ حابارلايدى Egemen.kz ماڭعىستاۋ وبلىسى اكىمىنىڭ ءباسپاسوز قىزمەتىنە سىلتەمە جاساپ.
زارداپ شەككەندەردى شىعارىپ سالۋعا ماڭعىستاۋ وبلىسى اكىمىنىڭ ورىنباسارى تىلەگەن ابىشەۆ, اقتاۋ قالاسىنىڭ اكىمى ابىلقايىر بايپاقوۆ, قازاقستان حالقى اسسامبلەياسىنىڭ مۇشەلەرى, ەل اقساقالدارى, جاستار جانە قوعام وكىلدەرى قاتىستى.
ماڭعىستاۋلىقتار باۋىرلاس ەلگە جىلى تىلەكتەرىن ءبىلدىرىپ, قولداۋ ءبىلدىردى.
قازىرگى تاڭدا ماڭعىستاۋ وبلىستىق كوپبەيىندى اۋرۋحاناسىندا 6 ناۋقاس ەم الىپ جاتىر, ونىڭ ىشىندە 4 ادامنىڭ جاعدايى اۋىر, 2 ادامنىڭ جاعدايى ورتاشا. جاراقات العاندار بارلىق قاجەتتى مەديتسينالىق كومەكپەن قامتىلعان.
ايتا كەتەيىك, اپات سەبەبىن انىقتاۋ ماقساتىندا اقتاۋدا ۆيتسە-پرەمەر قانات بوزىمباەۆتىڭ باسقارۋىمەن ۇكىمەتتىك كوميسسيا جۇمىس ىستەپ جاتىر.
ماڭعىستاۋ وبلىسىنىڭ اكىمى نۇرداۋلەت قيلىباي زارداپ شەككەندەرگە مەملەكەت تاراپىنان بارلىق قاجەتتى قولداۋ كورسەتىلىپ جاتقانىن اتاپ ءوتتى.